娜姐胸猛要錢唔要仔
性感女神周秀娜一直「放盤」搵好男人，但真愛難求，加上近期有不少偷食新聞，娜姐對男人冇晒信心，疊埋心水搵銀至上。密密做的她近日收近千萬酬勞化身「盜墓者娜娜」代言，又計劃將酬勞入股代言品牌擴展生意王國，她更揚言要錢唔要仔︰「依家事業行先。」
谷胸上陣的周秀娜，大晒馬甲線。
周秀娜換上不同造型拍宣傳照。
周秀娜與代言的健康瘦身食品公司老闆Amy（左）合作愉快。
有樣又有身材的周秀娜去年初與舊愛陳偉成分手後，即成為單身男獵物，雖然多次拍到與異性約會，可惜愛火撻極唔着，儘管早前再有神秘男送花，但其感情依然得個「吉」。本來一心想搵好男人的娜姐，眼見近期城中偷食新聞，令她對異性頓時失去信心，擔心最後揀中個「爛燈盞」而再受情傷，故決定放下感情事，專心搏命搵錢，認為晚晚攬住銀紙瞓更有安全感。
拓展女人生意
連月來密密接Job吸金的娜姐，近日荷包再進帳近千萬，被健康瘦身食品行健堂睇中擔任代言人。娜姐於新一輯代言廣告中解放雙峰，以多個性感造型示人，當中一個模仿經典「盜墓者羅拉」的造型，穿低胸背心及熱褲的娜姐谷胸出擊化身「盜墓者娜娜」，早前被指上圍縮水的她，谷出四吋事業線外，更展現纖腰及苦練得來的馬甲線，而另一個造型她穿上透視低胸裙，雙峰若隱若現，相當性感。
近年撈過界搞內衣生意的娜姐對事業充滿野心，一直密謀擴展事業王國，據知她深明女人錢易賺，有意開拓多門女人生意，計劃將是次代言酬勞入股該瘦身食品，升呢做老闆娘搵銀。對此，昨日娜姐接受電話訪問時承認有此計劃，並說︰「今次要多謝老闆Amy，除咗演藝事業外，我對做生意都有興趣，因為老闆娘有好多諗法，所以我想將酬勞作為投資資本，入股佢哋嘅品牌。（由代言人升呢做生意拍檔？）如果佢願意當然好，但佢咁努力建立事業王國，唔知畀唔畀我入股呢？」
愛情曾經佔好大
提到滿腦子生意大計，問娜姐是否要錢唔要仔？她不置可否︰「人每個階段所佔比重唔同，愛情曾經佔個餅好大，但依家事業行先，男友隨緣，依家諗工作多啲。我享受拍戲，但做生意有好多趣味，實在太吸引。（係咪因為內衣生意好，所以搞多啲生意？）我係學嘢階段，聽會計講結果似乎唔錯，但距離成功仲好遠。」此外，昨日有報道指她到泰國捐棺材催運，她說︰「唔知咩事，未聽過。」
