李思欣商線發展

藝人李思欣（Charmaine）2004年演藝學院畢業，憑卓越成績獲無綫錄用為合約演員。醉心演戲的她視演藝事業為夢想，成為當年《赤沙印記@四葉草2》的成員之一，大感幸運。已約滿無綫的Charmaine，在娛圈不知不覺已打滾十個年頭，她坦言獲益良多，反思十年來所做過的和所得到的，並稱是時間讓自己稍作靜思期，嘗試向其他方面發展，為自己的未來再進一步：「十年來無綫給了我很多東西，知名度令我多了人認識。做人處事上的經驗亦有所得益。依家同十年前相比，電視頻道係多咗好多。我想以一個Freelance形式向外嘗試，多咗電視台對演員來說係一件好事，可以多點選擇給自己，坦白講有幾個電視台都有斟洽合作。」

畢竟在無綫十個年頭，年齡亦隨之增長，李思欣認定是時候出去嘗試：「以前喺無綫以拍劇為主，近年都多咗啲主持工作，喺司儀同主持技巧上都有改善，希望可以向綜藝節目、主持方面發展。」

在事業如日方中之際，Charmaine於2012年突然與拍拖不久的男友范振鋒結婚。女藝人拍拖和結婚往往被視為事業的絆腳石，但Charmaine愛情至上勇敢踏出公開戀情的一步：「當時拍拖未公開，都有問男友如果畀傳媒影到相，認唔認大家拍緊拖。我哋方向都好一致，覺得沒有必要去隱瞞一件事實，既然大家都覺得冇問題，思想一致下決定不介意將戀情公開，大家又唔係大人物。咁啱自己宣布婚訊後，陸陸續續又有唔少藝人宣布婚訊，感覺到時代轉變咗好多。」

婚後帶挈多Job

Charmaine坦言公開拍拖及決定結婚時，曾考慮會影響演藝事業的前途：「曾經同男友講，我結得婚預咗呢行冇得做，因為以前有個感覺，結咗婚嘅女藝人係演藝事業嘅終點。但未知係咪時代轉變，反而婚後多咗工作以夫婦檔出席，係一個意外收穫。」

對於結婚，Charmaine細數老公范振鋒的優點：「雖然佢好多工作，好忙會好夜返，但係佢畀到我一種安全感，我係可以搵到佢，令我覺得呢個男人可靠、誠實，係佢最吸引我嘅地方。由拍拖到依家，佢會將一日工作行程同我交代一次，又會不時打畀我同我講去緊邊，呢行入面我會覺得好放心。身為一個女仔，好怕搵唔到自己個男友去咗邊。」她對老公繁忙的工作，不會有半點怨言：「佢咁多工作，目的都係想大家將來過得舒服啲，都係為咗個家庭着想，係一件好事。男人有事業心總好過冇事業心，做一個有責任感嘅人。」

眼見老公生意做得有聲有色，身為太太的Charmaine不敢怠慢急急增值自己，早前完成珠寶鑽石鑑證課程，現在更主理網上鑽石買賣生意，生意不錯：「諗深一層幕前工作會有壽命，唔會話可以好長久，同埋幕前工作比較被動，冇咁穩定。但有一個個人技能，總算叫做自己有盤生意，可能有個可觀啲收入來源。」

老公畀意見幫打骰

Charmaine感激老公在生意上提供意見，令她更得心應手，雖然大家沒有因此有拗撬，但老公性格較緊張和着急，有時難免說話較激動：「佢主觀性比較強，好有個人意見，佢成日覺得年紀大過我，見識同經驗都多過我，我係有需要聽佢講。有時我見勢色唔對，都會暫避佢嘅話題，咁就化解到爭執機會。」

問到會否向商界發展做女強人，Charmaine自言會嘗試不同形式的生意：「之後我都會搞餐廳生意，但始終我都係門外漢，人脈同溝通上都仲要時間去學習，所以現階段都需要由老公帶領住我，到上咗手先再安排我主理番，但我會繼續兼顧娛樂圈事業。」

現今社會的時尚女性，隨了樣貌外，亦需要注重自己的內涵，不要只得一個空殼，Charmaine說：「如果你得個靚字，但得個樣乜都唔識，好容易喺社會上被人取代或淘汰。如果你去裝備自己，積極啲做每一件事，萬一老咗都會好叻。」

互相遷就戰勝年齡差距

李思欣與范振鋒年紀相差約十載，但無阻感情發展，最終更拉埋天窗。李思欣表示兩人雖有年齡距離，但日常生活中互相遷就，相處得好好：「每個人都係獨立個體，性格一定會有出入，好多事我哋都係婚後慢慢調校。好似我好鍾意睇戲，以前佢都會陪我一星期睇一次戲，但佢總係為睇而睇，但過咗一段日子佢都受到我嘅感染，主動提出睇戲要求。」

李思欣坦言受老公感染變得健談：「以前同佢朋友出街食飯，我比較靜，依家識得主動打開話題，學識同人溝通，我喺佢身上學到好多嘢，佢都改變咗我好多。（畀老公幾多分？）70分啦，仲有30分進步空間。」