來自馬來西亞的情歌王子張智成自2009年在港演出後,事隔5年終定於8月24日再度踏上九展舞台,舉行《記得‧是最好的張智成演唱會「香港站」》。昨午,他專程來港出席記者會,並獲好友李逸朗送上球拍做賀禮,兩人即席大晒球技!

張智成(左)獲主辦單位送贈旅行篋,寓意港騷滿載而歸。

智成在鑽石山荷里活廣場舉行記者會,吸引大批粉絲到場追星。

張智成盛裝現身鑽石山荷里活廣場出席演唱會記者會,甫出場即獻唱,其後再與內地及香港歌迷大玩遊戲。他獲主辦單位送上旅行篋做禮物,寓意在港開騷滿載而歸!久未在港露面的李逸朗(Don)帶着羽毛球及球拍到場,稱早年在北京結識智成,曾相約打波:「不過我太渣,打過一次後就冇再搵我!」兩人其後即興在台上試打羽毛球。

隨時加場止歌癮

智成對於事隔多年重返香港開騷興奮不已,並指開一場絕不夠喉:「希望係一個開始,反應好可以考慮幾時再開!」他在台上透露體重最近增加了數公斤,因此演出前要努力做運動Keep Fit,問到屆時會否在台上除衫騷肌?他笑說:「咁咪變咗賣肉?其實之前唱快歌都騷過,但今次都係希望音樂行先!」

至於近年長駐內地拍劇的Don則透露,今年主力製作個人新碟,目前已差不多完成作品,有望在下月推出。他又指智成有為其新碟創作一首歌曲,首支派台歌將於下周推出:「今次好開心,請到劉心悠BB幫手錄咗個劇場版,佢喺入面仲唱得多過我!」