港姐蔡思貝及劉佩玥等昨日到尖沙咀出席TVB《2016里約奧運會》暨《2014南京青年奧運會》記者會，蔡思貝說：「想自薦去南京，但要拍劇，劇組話我膚色唔連戲，因為我做行山節目《山系女行Yama Girl》，天雨關係，拍咗半年都未完，嚟緊仲要去露營，曬黑咗，差啲中暑，又畀嘢咬到對腳花晒，但都值得，呢個係我喺TVB第一個節目，希望有美白產品可以贊助吓！」

蔡思貝（右二）及劉佩玥（左二）齊齊宣傳奧運節目。

同場的霍震霆則透露將出發往巴西：「去睇世界盃揭幕戰。（家庭成員都去？）霍啟山對足球有興趣，其他成員唔去啦！（買咩手信畀孫仔中曦？）之前買咗個波畀佢，佢有啲運動細胞，到大啲再睇吓鍾意咩運動。（新抱郭晶晶與中曦被偷拍？）佢嚟探嫲嫲，游吓水，其實做媽媽都好吃力。（父親節定好節目？）應該早啲提吓佢哋（兒孫），話佢哋聽要對父親好啲。」