胡杏兒拍畢與陳豪合作的無綫新劇後，將小休一個月到內地出席活動賺外快，下月會與黃秋生合作新劇《梟雄》，她期待與影帝合作，並希望靠演技來感動秋生，博對方邀約做舞台劇過戲癮！

杏兒與陳豪帶兩隻狗狗合照，陳豪更搞笑騎狗。

一眾《陪著你走》的台前幕後出席煞科飯局。

黃秋生

由胡杏兒、陳豪及姚子羚等合演的無綫新劇《陪著你走》前晚舉行煞科飯局，杏兒稱這套劇拍得輕鬆，反而陳豪主線多較辛苦，她又透露下月將與影帝黃秋生合演另一新劇《梟雄》，而她會趁中間約一個月的空檔到內地賺外快：「應該係7月開工，所以有得抖吓。（期待合作？）十分期待！咁多好戲之人。（開拍前搵銀？）做吓活動囉！返內地又有啲活動咁。（順手搵男友？）搵錢易過搵男友，冇所謂啦！隨緣。（有指秋生拍劇要倒貼？）咁佢拍開幾百萬製作，點同呢！相信佢唔係向錢看，返嚟都係為興趣，之前有睇佢舞台劇覺得超勁，軒仔（張敬軒）都超晒班！（恨做舞台劇？）想呀！十年前做過，睇吓有冇機會啦！希望用演技感動秋生，等佢邀請我做舞台劇。」

而陳豪將於月底再開新劇，湊仔任務落在老婆陳茵媺身上，但指下星期的父親節一定會慶祝：「囝囝6個月大，依家先識坐。（識叫爸爸？）未呀！父親節一家大細出去食吓飯、行吓街都好開心。（老婆代囝囝送禮？）老婆好忙，湊BB用晒佢時間，其實禮物唔緊要，大家一齊已經好開心。」

陳豪帶B遊泰變苦力

被取笑母親節冇代囝囝送禮物給老婆的他又死撐有慶祝：「有送花，基本嘅我有做。（出埠歎吓？）有時間會，上次帶囝囝去泰國玩，最辛苦係自己，全部嘢我拎！好期待帶佢游水，但醫生建議最好6個月後，因為太細嘅BB好快會冇晒體溫。」

另外，被指逼婚不遂以致與男友分手的姚子羚說：「其實分開咗好耐，冇逼婚，內容都係錯，佢唔係夜場老闆，只做文職，因性格不合而分開。（現時關係？）普通朋友囉！」