一向唱得的陳柏宇和泳兒原來在內地酒吧騷稱王封后！二人每次出騷都有幾萬人仔進帳。不過唔辛苦邊得世間財，賺錢同時又要提防醉酒客及鹹豬手，故泳兒早已有方法擊退滋事分子！

吧后騷價8萬
月賺64萬人仔
泳兒每次出騷均帶同多位保鏢，笑言不怕被「襲擊」。

吧王騷價4至5萬
月賺50萬人仔
陳柏宇於內地密密登台吸人仔。

陳柏宇試過於獻唱期間被醉酒客拋上台的薯條擊中。

陳柏宇不時返內地掘人仔，憑電影《喜愛夜蒲》系列在內地聲名大噪的他，平均每唱一場45分鐘的酒吧騷便穩袋4至5萬元人民幣，每次只需唱3首歌加握手簽名。而有「勤力王」之稱的他更曾一個月跑10場，話咁快有50萬人仔落袋，吸金力驚人！

至於騷價8萬元人民幣的泳兒，平均每月唱6至8場，最多袋64萬人仔！密密唱、密密賺的她成功撼贏一眾香港女歌手成為「吧后」，而不時北上唱酒吧騷的還有洪卓立、小肥、關楚耀及組合As One等。

唔覺內地出騷Cheap

雖然人仔看似易搵，但箇中辛酸真是有苦自己知，因酒吧不時有醉酒客鬧事，柏宇便試過差點「中招」，他說：「試過唱唱吓有人向我丟嘢食盒同薯條，不過冇丟中塊面。多數係啲客飲大咗，或者啲仔攞威，通常我睥一睥佢都唔敢再丟。又試過個台得幾格階磚咁大，真係同觀眾近距離接觸。」但他不覺接酒吧騷會被人睇低一線：「我唔覺Cheap喎！如果我有幾千萬都唔使唱，但我冇嘛！」他又謙稱賺得少：「邊有跑10場咁多，有我發咗達！最多一個月6場，不過價錢又收得幾準。」

至於女歌手出酒吧騷更危險，要不時提防鹹豬手出現！功力深厚的泳兒自有一套方法擊退鹹豬手：「每次出騷都有6、7個保鏢睇住我，不過有次有個醉酒男衝破防線想撲向我，將我同事揈埋一邊。我又試過被人摸腳，所以依家我見到台下有人腳步浮浮都會碎步碎步行開，唔好畀佢捉到。」她又指最慘是舟車勞頓：「試過去好遠地方，單程都搭咗6個鐘車，來回搭足12個鐘，真係頭都暈。」