自與內地女製片人汪子琦傳緋聞後，馬賽雖獲無綫放生，但一直被投閒置散，近日更由昔日上位花旦「降呢」任娛樂台主播，但有打不死精神的馬賽仍撐到底，昨日揚言視不同工作為挑戰及學習，現時只會與工作拍拖。

與何傲兒（左）出席龍舟賽的馬賽自爆轉做娛樂台主播，但仍死撐當新挑戰。

王浩信等無綫猛男力「撐」，好彩唔使包艇。

張名雅擘髀出力打鼓，但睇落龍頭負重好大！

蔡思貝持旗打氣做啦啦隊。

無綫一班小花如馬賽、蔡思貝及何傲兒等昨日出席《2014年無綫盃中龍混合邀請賽》，並為「TVB龍舟隊」打氣，前港姐張名雅則任鼓手，但七支參賽隊伍中，「TVB龍舟隊」只以第6名衝線。

感激公司畀機會

場邊擔任啦啦隊的馬賽與何傲兒十分興奮，參選港姐時曾觀賞龍舟賽事的馬賽自嘲未夠資格參賽，靜寂了一段時間的她又暢談近況，指是日將加入娛樂台當普通話主播，事前更花了一星期訓練：「拍開劇唔慣對住鏡頭講嘢，同埋都要自己寫稿，以前好驚講嘢，依家公司畀咗機會我，對我喺出面做司儀工作都會有信心，但做主播真係難度高過拍劇！（覺唔覺得做主播降呢？）唔同工作有唔同挑戰同學習，我主持方面係弱啲，會用積極心態去練口才，希望做個全能藝人。（公司幫你洗底？）我冇咁去諗，公司一直係錫我嘅。」

何傲兒代姊解畫

馬賽又指即使出任主播，亦不會暫停拍劇，若然遇到合適劇本依然會接拍。問到現時工作有新方向，感情方面又如何？她說：「依家同工作拍拖好開心，都好忙，唔會去諗呢啲嘢，亦唔會浪費時間喺呢方面。」

至於何傲兒則為姊姊何傲芝被傳與曾參加《星夢傳奇》的張明偉拍拖作澄清，指姊姊享受現時生活，雖有追求者但會慢慢揀。問到父親是否介紹有錢人給她倆？何傲兒無奈地說：「自己係小康之家，馬圈一直有自己朋友圈子，唔明入行後就有人話娛樂圈女仔要識富豪同馬主，呢啲都係我識嘅朋友，咁家姐有咩對象，我會幫眼嘅。」

另外，何傲芝昨日接受電話訪問時同樣否認戀情，指當日只是搭順風車；張明偉則透露與傲芝只屬普通朋友，亦不覺對方是拜金女。