「巨聲幫」吳業坤昨日偕胡鴻鈞及馮允謙參加籃球友誼賽，被爆因窮而與女子組合Super Girls成員Aka（趙慧珊）戀情胎死腹中的他，情場失意卻球場得意，射入關鍵入球協助球隊險勝香港女子籃球隊。

狀態大勇的吳業坤帶波進攻。

吳業坤（右二）全神貫注地準備搶籃板球，十分投入。

胡鴻鈞（左）與馮允謙比賽後大汗淋漓。

吳業坤、胡鴻鈞及馮允謙昨日到旺角麥花臣場館，出席由香港籃球總會主辦、《東方日報》及《太陽報》任支持媒體的《Panasonic學界籃球邀請賽》，三人代表VR1隊出戰香港女子籃球隊，而吳業坤趁機澄清與Aka感情觸礁的報道：「係我怕自己窮，自卑唔敢發展，大家唔好誤會Aka，佢係好女仔，好慳家，唔係港女。（受到壓力先澄清？）唔係，係我內疚，想講自己窮又表達得唔好，怕引起誤會。」他又不忘向心中女神歌手吳若希隔空慶生：「有叫佢睇波，但佢生日忙啲囉！（送咩禮物？）佢今晚做慈善，或者我捐523蚊，祝佢5月23日生日！」

馮允謙病住打

胡鴻鈞及馮允謙則齊聲大讚與香港女子籃球隊作賽機會難得，胡鴻鈞說：「佢哋進攻同防守意識好好，係一隊值得尊敬嘅對手，絕對係賞心悅目嘅賽事！」馮允謙則自爆抱恙：「喉嚨痛睇3次醫生都未好，但今次對賽機會難得，佢哋為球迷帶來精彩賽事！」

此外，吳若希昨日出席慈善活動拜神儀式時表示，前日生日大把節目：「慶祝活動係睇醫生，因為扁桃腺發炎怕影響唱歌。呢輪忙拍廣告，要6月至有時間同Fans慶祝。（生日願望想有男友照顧？）係陪伴，依家搵緊！」