歌手漢洋與譚嘉荃今年為公司拍電影，由幕前轉戰幕後，做慣幕前的二人卻大呼有難度！兩人為求拍攝順利，每次拍攝都盡量親自監場，即使開早或開夜都風雨不改，認真唔話得！

譚嘉荃在新片中客串貨車司機一角，令人耳目一新。

漢洋及譚嘉荃無論在幕前幕後都合作無間，自然建立了一定的默契。

漢洋及譚嘉荃早前在合唱歌《約定》的MV中飾演一對情侶。

漢洋與譚嘉荃（Amy）今年由幕前轉戰幕後，為公司旗下的電影《奇緣灰姑娘》擔任監製及助理監製，二人更親力親為，不時到場打點一切，從不假手於人，問到會否感到困難及壓力，漢洋笑說：「我本身都係經理人，都叫做半個幕後人，所以今次都唔太難，不過最難都係要同各個部門交代進度，我仲係學習緊！」

至於做慣歌手的Amy，今次除了擔任助理監製外，亦在戲內客串一角，她笑言難度甚高：「我平時做慣幕前，所以今次對我嚟講都係一個大挑戰。每次劇組排戲，無論係開幾早或幾晏，我都盡量喺現場打點，睇多啲同埋學多啲。（有冇唔習慣？）起初都有少少，最辛苦係做統籌，要一個人聯絡晒咁多個人。（戲入面做咩角色？）我飾演貨車司機，感覺好麻甩，同平時嘅我好唔同，都係一個大挑戰。」

碌人情卡靠牙力

而漢洋則透露碌盡人情卡，力邀多位好友客串電影，他說：「為咗電影，我都出咗唔少牙力搵朋友客串。（搵咗邊個？）呢個我就要賣關子喇！等大家入戲院睇吓啦！我只能講我旗下嘅歌手都有份客串囉！」