組合「Lemonbeez」成員韋彤早前秘密生B並停工，而另一成員袁紫僑今年則要單飛出碟，袁紫僑稱一早估到對方有咗，不過她笑言唔急生B，因照顧家中6隻愛狗已忙個不停，並說︰「依家仲揀緊對象！」

今年單飛出碟的CoCo，會以新形象示人。

CoCo表示錄音緊張時會帶同愛犬定驚。

CoCo與友人合資的時裝生意成績甚佳。

性感女神周秀娜同門、組合「Lemonbeez」成員袁紫僑（前名︰袁聖殷，CoCo），今年單飛出碟，過往走可愛路線的她將會有新嘗試，會以Rock爆新Look示人，向來覺得唱歌非常簡單的她亦改觀︰「初初覺得唱歌好簡單，但依家覺得好多嘢要學，好多嘢要準備，發現唱一首歌好難，唔同平時唱K，好多嘢要去留意，每一個字擺幾重落去，幾多感情。」訪問當日，CoCo帶同愛狗到場，她透露之後錄音都會考慮帶狗定驚︰「如果好驚好緊張我會帶，因為帶狗去會覺得好舒服。」

時裝生意成績理想

提到Lemonbeez另一成員韋彤早前生B，CoCo笑言當時一早估到，更開口問對方︰「嗰時估到佢好似有咗，覺得佢奇奇怪怪咪問佢，跟住佢就認，而之前我都有買BB嘢送畀佢。」問到有否生B衝動？她說︰「有排啦！我未揀定，而且我身邊咁多狗，有成6隻，邊有時間睇，同埋如果生BB要好好照顧佢，又要返學又要學嘢，好大責任。」

此外，CoCo近年與友人合資搞時裝生意，她坦言成績理想︰「做得幾好，見行街好多人着我哋品牌，係一個好好起步，因為設立品牌唔係咁易有一個地位，可能要做10年人哋先知有呢個品牌。」至於會否怕有冒牌貨，她說︰「唔驚，有人翻版證明賣得好，之前有發現過，之後用法律途徑解決件事。」