前港姐近日到尖沙咀擔任火鍋店的開幕嘉賓，以喱士白裙優雅亮相的她在受訪時自爆經常招呼朋友到家中打邊爐：「我成日打邊爐，叫朋友上嚟開餐就最方便！好處係就算佢哋覺得唔好食，都係佢哋淥得唔好，唔關我廚藝事。（對廚藝冇信心？）唔係，我有道招牌菜叫『冬菇炆雞』！好多人都讚過我煮嘢好食！」

陳法蓉最愛招呼朋友到家中打邊爐。

問到經常中、港兩邊走拍攝廣告及劇集的她感情有否着落，她即提起日前因前男友的錢債糾紛而登上欠債大字報一事：「事緣我上年睇報紙雜誌嘅報道話有張大字報寫咗『陳法蓉前男友欠債』，今年呢張大字報又再翻炒出嚟。我承認當年有同對方拍拖一年，但分手後就再冇聯絡。如果追債者想透過我搵對方出嚟就機會渺茫喇！（唔開心？）係，因為我冇諗過會出現喺欠債大字報上，雖然上面寫明唔係我欠債，但希望事情可以盡快解決。」