o靚模仙樂都早前率領五位魔女，為節目走訪猛鬼之地探靈、招魂，與亡魂「開飯」的Susan更險被「捅」，而Ruby則開耳與靈體對話，一眾索女認真搵命博！

仙樂都自爆曾畀鬼跟，要師傅做法事幫佢驅鬼。

一班索女跟隨梁思浩走訪香港猛鬼勝地後都大嗌怕怕。

仙樂都早前偕Susan（蘇珊）、Ruby（黃紫桐）、Creamy（傅蘊盈）、Carmen（陳嘉嘉）及Katie（許芯悅）為有線節目《怪談．6魔女》走訪香港猛鬼勝地探靈，主持梁思浩大讚仙樂都最大膽。仙樂都坦言拍攝時是硬住頭皮扮冷靜，她又分享「開心」經歷：「之前去墳場同靈體影相，懷疑惹到隻鬼，返到屋企成日疑神疑鬼，沖凉都覺得有黑影。後嚟公司請咗師傅幫我驅鬼，點知佢話隻鬼唔係喺墳場嚟，係一直都跟住我，好在感覺唔到，依家感覺輕咗、精神咗！」

Susan險被捅

而在流浮山猛鬼羈留室與亡魂「開飯」的Susan憶述，險遭酷刑致死的越南亡魂追斬：「當工作人員一走，我開始感到好多黑影喺廁所出嚟，仲見到個『實體』男人揸刀走埋嚟，我驚佢捅我就即刻合埋眼嗌，又丟埋佛珠同飯盒，好驚險，後來仲發咗兩日燒。」Ruby則自爆曾開耳與靈體對話：「我喺警局見到個冇頭冇腳嘅影，仲聽到把男人聲話『我好想走，好驚』，嗰刻我仲驚！但知佢係冇惡意，就問佢係咪想幫手，其實我都嚇到呆咗！」

而超細膽的Katie卻慘遭鬼上身，在無意識下更出手打導演及工作人員，幸事後有師傅為她淨身。而在小白鷺某蝙蝠房中唸經超度亡魂的Creamy則被「鬼掩口」住喉嚨無法出聲，令她最終失控崩潰兼失眠，以黑檀香招邪靈的她憶述，在一個荒廢度假村中燒香及衣紙時，四周出現許多零碎的聲音，嚇得她一把火燒了十幾支香，然後拔足狂奔。