宅男新寵盛朗熙（Joy）憑清純樣貌，入行一年獲得不少工作機會，然而愛情方面卻交白卷，她自爆由細到大都少人追，來港後更與戀愛絕緣，幸而樂觀的她未覺Dry爆，反而享受單身快樂。

影壇新人盛朗熙樣貌標致，一出道便有「翻版李英愛」之稱。

Joy自爆由細到大都甚少人追，而她亦不會主動跟男生表白。

有「翻版李英愛」之稱的24歲新星盛朗熙（Joy），集合李英愛、關之琳及張栢芝的外貌與氣質，難怪入行短短一年已獲得不少工作機會，目前主力拍攝電影，偏偏如此美女卻冇人追，她說：「由細到大都冇人追，我都唔知點解，但真係冇，我讀書時身邊好多朋友一早拍晒拖，我仲係冇人追，直到18歲先第一次拍拖。」

外表清純的Joy內心一樣純潔，由於不會主動跟男生表白，因此通常只會暗戀別人。至於去年來港發展的她，入行後更加冇人追，她說：「初初來港連廣東話都唔識，去邊度都係同同事去，唔會亂出街，依家已經習慣香港生活，不過身邊多數都係女仔。」話雖如此，Joy卻未有覺得單身苦悶，反而享受冇拖拍的樂趣：「我依家都好忙，冇時間拍拖，一星期要學廣東話、跳舞、打功夫，已經填滿我個時間表喇！所以感情事真係隨緣啦！公司冇阻止我拍拖，只係我比較慢熱，哈哈！」

恨做打女

去年初嘗拍電影滋味的Joy，一拍便愛上，更希望做打女，不想局限美女角色：「其實我好想試拍打戲，依家練緊功夫。（叫公司開戲畀你？）咁又唔會咁大想頭，我覺得先準備好自己，日後別人就會想起用我。」她更希望將來嘗試拍劇：「我鍾意拍劇，因為可以學到更多嘢，再辛苦都唔怕。」