薛家燕早前與鍾嘉欣等到新加坡登台，兩人趁工作空檔到環球影城遊玩，期間巧遇台灣失明歌手蕭煌奇，家燕姐說：「我起初奇怪佢係失明人士，入到影城睇唔到會唔會好可惜？點知嘉欣同佢Say咗聲Hello，佢就對嘉欣講『你長得好高呀』，我不知幾驚，心諗你千祈唔好話我矮呀！好在佢冇，仲話想用呼吸去感受現場氣氛，之後同佢寒暄咗幾句，覺得佢感覺好靈敏，之前已經好欣賞佢歌藝，依家更加佩服佢！」

飾演女軍閥的董敏莉（右）直言被考起演技，但她表現專業投入。

家燕姐又大爆與嘉欣玩得忘形：「我哋去睇《變形金剛》立體電影，啲視覺效果好逼真，又有啲熱風吹埋嚟，我哋驚叫咗4分鐘。好多年前已經想同嘉欣登台，嗰時佢都未做歌手，但拍劇空檔我聽到佢哼歌，我話『唱得咁好應該做歌手，第時要搵你登台添』，但一直冇機會，今次終於成事！另一個驚喜係曾志偉，本來叫佢做主持，原來佢唱《你把我灌醉》好犀利，嗌到爆咪，全場掌聲，我叫佢參加下輯《我是歌手》！」