生於單親家庭的董敏莉自小缺乏父愛，故對婚姻未有抱太大期望，卻笑稱與男友感情穩定，若適合更會考慮結婚。

極具默契的董敏莉與Danny老友鬼鬼，綵排時充滿歡樂！

成長於單親家庭的小鬼，希望一家人齊齊整整。

飾演女軍閥的董敏莉（右）直言被考起演技，但她表現專業投入。

藝人董敏莉（Monie）、陳炳銓（Danny）及陳意嵐（小鬼）綵排舞台劇《玩死卓別靈2》，眾人均非常投入！Danny更要與飾演自己不同性格的演員搏鬥，鬥到面紅耳赤兼頭髮亂了！Monie則化身女軍閥，嬌滴滴的她大嘆難演：「聲音要粗豪啲，嗰段係用俄文演繹，本來佢哋想我亂作一堆聽唔明嘅語言，但我想講出嚟內容係有意思嘅，所以搵咗個俄羅斯朋友教我，咁啱佢喺俄羅斯當過兵，所以將十幾年前啲軍人指揮Command搬出嚟畀晒我，都幾有趣！」至於小鬼有場分手戲要喊得犀利，她笑言不知喊了多少遍：「其實個劇本冇寫要喊，但做到嗰個位就會好自然流露。」

新加入劇團的Monie笑言，首次跟Danny傾劇本時似睇心理醫生：「因為大家將自己不為人知嘅事、心路歷程，所有嘢都攞出嚟講，好似我哋3個都係單親家庭長大咁，同小鬼第一次見面就傾愛情，仲要係好Deep咁講。」Monie在劇中要穿婚紗示人，33歲的她指一直對婚姻沒有太大幻想：「兩個人一齊好就好，就算結咗婚都可以唔好，依家同男友感情好穩定，身心愉快，如果搵到啱嗰個會考慮結婚。」

Danny小鬼望成家

同屬單親家庭長大的Danny及小鬼則持不同想法，Danny說：「近年想要個家庭，想穩定啲，如果養到最好生3個。」小鬼亦渴望家庭溫暖：「因為自細就冇完整家庭，所以成日都恨屋企好似《真情》咁，成家廿幾人坐埋食飯。」