連詩雅推出新歌，突破以往「慘情歌姬」形象，化身狂野型女挑戰快歌。她坦言今年希望作多方面嘗試，會以中性形象示人，剪短一頭標誌長髮，但強調會堅守「髮」則，不做男仔頭！

連詩雅Keep住學跳舞，務求挑戰快歌。

連詩雅自小受母親影響留有一頭長髮。

連詩雅早前為新歌《Come On》拍攝MV，並以全新形象示人。

連詩雅（Shiga）日前到電台宣傳新歌《Come On》，她表示新歌是以往少見的重電子味音樂，打破她以往唱慘情歌為主的形象，她說：「今次都幾大突破，有少少狂野嘅感覺，呢個形象幾配合首歌，因為首歌係講型格，吸引到人注意。（跳舞？）表演時未必會排晒舞，但我Keep住學跳舞，希望表演時會有啲郁動。」

大讚「男神」Nice

Shiga表示今年是她入行第4年，希望吸收更多新事物，例如學跳舞及學樂器，形象上則試行中性路線，更下定決心剪短一頭長髮：「我未試過剪短髮，未知剪幾多，好難接受剪短髮，不過當吓新嘗試，咁大個女未試過短過心口。因為我受媽咪影響，佢係上海人，典型長頭髮，畀我感覺好靚，好有中國女性韻味。」她又透露初入行時曾因剪短頭髮而落淚，若拍戲角色要求做男仔頭？她說：「如果有機會因為拍電影或者工作關係要剪到男仔咁，我要慎重考慮吓先。」

Shiga又透露將於暑假與古巨基、林欣彤及方皓玟舉行拉闊音樂會，首次與基仔合作的Shiga十分期待：「我哋影海報時第一次傾偈，佢個人好Nice，好鍾意睇佢嘅電影，佢係我讀書時嘅男神，希望跟佢學吓嘢。」