田蕊妮家中有個惹火老公杜汶澤，為馴服這頭「小野豹」，貼心人妻阿田自有三招御夫術，秘訣是寧要簡單生活，莫求奢華浪漫，誓要從細節上讓老公感受到「不再讓你孤單」的愛！

事業心重的阿田亦不忘花心思滿足老公阿澤的胃，故四出試菜偷師。

「四處樹敵」的阿澤面對老婆阿田，即由「小野豹」變身「小家貓」！

貼心人妻阿田跟DJ李國能大談三招御夫術。

阿田早前接受新城DJ李國能《音樂通世界》訪問，大談與老公杜汶澤九年來的夫妻相處之道。不論天后容祖兒還是影帝黃秋生，甚至是特首梁振英愛女，阿澤都膽敢公開寸爆，辣着的火頭多不勝數！本以為作為阿澤背後女人的阿田會難逃一鬧，怎料二人原來拗撬不多，全靠阿田三招御夫術馴服老公。

見少啲少拗撬

第一式是「簡單勝浪漫」，阿田說：「大家好珍惜彼此關係，我哋兩個好簡單，一齊唔會特別驚喜、浪漫，我好驚要刻意營造一啲嘢，反而注重生活細節，例如佢為我煮吓早餐，我又煲吓湯咁。」她又視阿澤為一家之「煮」：「嗰日我哋食乜一定由佢話事，佢太鍾意煮嘢食，對食嘅要求好執着！」

不過，夫妻相處多年難免出現小爭拗，故第二式是「亦夫亦友」：「我哋有咩事都係商量多，當意見唔啱嗰下會好嬲，但大家唔會傾住，等冷靜咗先，我哋係朋友底！（邊個認低威先？）睇吓邊個得閒就邊個！」

至於第三招是「小別勝新婚」，阿田說：「我哋呢排好少見，依家佢仲爭我一餐飯，我哋打賭邊個拎奧斯卡女主角，結果我估中咗。近幾年真係少咗好多拗撬，可能見少啲，大家冇咁留意對方，冇咁睇唔過眼啦！」而在阿田最新的翻唱發燒碟內，她刻意選了一首《不再讓你孤單》送給老公，坦言歌詞是現階段最想跟他分享的說話。