畢業於演藝學院的蔡瀚億（Babyjohn）憑出色演技奪得不少新演員獎項，人氣急升。除了有演技，原來其「樂」勢力不容忽視，3歲開始學鋼琴，中學時已考獲八級，後來再學結他、作曲、夾Band，最威水的是和一班朋友製作音樂劇，堪稱「才子John」！

有學琴的音樂根底輔助，蔡瀚億彈結他夾Band冇難度！

蔡瀚億自小學習鋼琴，但長大後才懂得享受音樂。

十指在琴鍵上飛舞，蔡瀚億不禁流露滿足的笑容。

蔡瀚億與同學仔自資演出音樂劇《逆轉陀飛輪》，實現夢想！

法寶跟身
自稱原始的Babyjohn沒有電子設備，紙、筆和琴就是其創作必需品。

Step 1

Step 2+3

Step 4

Step 5
完成

自3歲開始學琴的Babyjohn原來不是自己意願，他憶述當年學琴時的慘況：「老師會用膠間尺打手板，每次喊晒咁出嚟，媽咪就用杯紅豆冰搞掂我，個個禮拜都係咁。」中四時，Babyjohn考獲八級鋼琴，他指當時感覺「一身鬆晒」：「嗰時未開始鍾意音樂，考完先感受到好玩嘅地方，所以話考試真係冇乜樂趣！」

之後，Babyjohn開始學習流行曲，大學時更創作出第一首作品，他說：「有個賑災活動可以通過表演籌款，我就搵咗同學仔夾Band，我作曲我個Friend作詞，連續幾日搞到凌晨四、五點！之後嗰日表演，夜晚凌晨仲改緊詞，仲要返學！嗰次係第一次，好刺激！之後就愛上咗！」

自資開劇做總監

Babyjohn在演藝學院就讀戲劇專科，他和一班同學將對音樂的熱愛，與他們對戲劇的專業結合，藝高人膽大地齊齊自資自編自導自演音樂劇《逆轉陀飛輪》，Babyjohn更擔起音樂總監的重任，他說：「難得有一個興趣係可以實現嘅，不如嘗試吓！唔係話要賺，最緊要唔好蝕！大家由細玩到大，有商有量，一齊去實現一個夢！」他以行動告訴大家，為了夢想，他的確可以去到好盡！

創作需要靈感，Babyjohn的創作來源亦離不開音樂：「我都係靠平時聽歌嘅感受，我作嘅都係平時鍾意聽嘅歌嘅類型，不過我自問聽得唔夠多，要聽多啲唔同類型嘅歌先得！」靈感並不是要來便來，他亦不時遇到靈感一瞬即逝的情況：「我會發爛渣、鬧自己，嗰刻好想爆炸！所以愈趕愈諗唔到嘢，我鍾意慢慢嚟嘅。」他更笑言最討厭洗澡時靈感到：「我心諗『咁我點Jot低呢』！冇理由拎部電話入去隨時嘛，好想問成日喺廁所有靈感嘅人係點記低佢，哈哈！」

在音樂上，Babyjohn算是達成不少目標，不過他仍然謙虛地說：「到依家為止，我認為我嘅音樂都只係初哥級數同玩玩吓，始終創作係需要長時間去浸嘅，唔想咁急，對我嚟講係一種壓力，會喺適當嘅時候先至拎出嚟。」有才華但不自大的男人特別吸引，才子John，加油呀！

音樂X電影擦火花

專訪當天，Babyjohn一彈琴便進入忘我狀態，連拍照都忘記要望鏡頭，完全投入音樂中。剛簽約新公司的他，準備在影壇大展拳腳，不過他對音樂仍非常有火，期望有機會拍攝與音樂有關的電影：「我鍾意做戲，喺音樂上我想自己去摸，其實我好羨慕啲受正統訓練嘅人，正如有人好羨慕我演戲受過正統訓練一樣，但係人生太短，唔可以揀咁多嘢學嘅，始終電影係我嘅夢，好想有個角色係同音樂有關，透過套戲去玩音樂，我覺得一個有音樂底嘅人去演繹一個音樂人會特別啲！」

創作5部曲

熱愛創作的Babyjohn為了留住稍縱即逝的靈感，有其獨特的一套創作方法。

Step 1：靈感到，就把音彈出來，聽聽效果。

Step 2+3：用鉛筆寫低滿意的音符，不斷彈奏聽效果，然後用原子筆修改。

Step 4：大致連貫成一首歌後，就借朋友設備齊全的工作室，作最後編修。

Step 5：最後，符號手稿變成打印出來的真正五線譜，用心創作的歌曲完成了！