「妝到用時方恨少」，雨僑近年憑教化妝而殺出血路，鼓勵各「絲打」要勤於練習化妝，眼見近年整容風興盛，她自爆「心郁郁」想整埋一份！

雨僑恨整容但怕有風險，暫時都係靠化妝美化視覺效果先！

雨僑奉勸姊妹，勿以溝仔而整容！

雨僑近年在網路教分享美容心得，自認黐眼皮膠紙靚過整容。

靚女歌手雨僑近年「升呢」成為「美容達人」，除了在網路教化妝及擔任美容產品代言人外，還開創自家品牌。回想當初學化妝的日子，雨僑竟然用「醜」字來形容自己：「以前唔識化，死命畫自己對眼，死命搽嘢上塊面，每個人學化妝都有一個『醜』嘅階段，所以一定要練習。」

加工非為溝仔

眼見近年化妝漸有年輕化趨勢，雨僑亦老實不客氣地說：「有啲阿媽覺得唔正經嘅女人先會化妝，但唔通女仔想靚啲都唔得咩？同埋化靚咗，對世界都係美好o架！」

近年潮興人工美女，雨僑自爆曾考慮過整容，最希望割雙眼皮，但不想冒風險：「曾經有朋友去韓國割，點知仲核突過喺深圳割嗰啲，到現時為止都未見過有醫生割雙眼皮係靚過我自己黐膠紙。」

雖然雨僑不反對大家為了「變靚啲」而整容，但叮囑千萬不要為溝仔而「變形」，她語重心長地說：「變靚啲可以吸引多啲人追，亦可以建立自信心，但絕對唔可以為咗一個男人而整，咁樣好蠢！佢係鍾意就鍾意，唔好刻意改變自己，我曾經為咗一個鍾意高踭鞋嘅男仔而學着高踭鞋，但搞到對腳勁痛，真係好無謂！」