新人許雅婷最近於新片飾演反叛妹，角色身世坎坷除了不停要吸煙、吸毒及自殺外，其中一場更被大漢輪姦，她坦言拍攝前已被現場氣氛嚇怕而即場爆喊，精神差點崩潰，回家後心情未平復。

許雅婷與溫碧霞合作，幸得對方教路做反叛妹。

許雅婷與好友何浩文有激烈床戲，但未感尷尬。

初次擔正的許雅婷食煙、自殺戲乜都有，甚考演技。

許雅婷戲中慘被輪姦，埋位前見場景已嚇到喊！

新片《微交少女》中飾演溫碧霞女兒的許雅婷（Kabby），性格相當反叛。她表示首次擔正女主角，幸得溫碧霞教路，問到有否當年溫碧霞初出道的影子，Kabby說：「我都有睇番佢嘅作品，佢係我心目中嘅女神！同佢合作過後知道好難會有佢嘅影子，因為佢靚在骨子裏。」又讚對方相當照顧：「有場吸煙戲，我足足食咗一包煙食到嘔，佢立即幫我掃背同慰問我。」

戲中，Kabby與對手何浩文（Dominic）有場激烈床戲，她表示兩人早已認識，事前亦做足溝通未感尷尬，但另一場輪姦戲份，令她精神差點崩潰，Kabby說：「嗰日一到片場，見到個情景已經感到好不安，幻想到個情景好恐怖，好似真嘅一樣，自己即刻喊咗出嚟。」她指事後經理人有打電話慰問，但她仍未能平復心情而繼續爆喊。

否認係「新城嫂」

除了慘被輪姦外，戲中還有吸毒、自殺及吊威吔的情節，Kabby笑說：「好多嘢都係第一次，辛苦但學到好多嘢。」還自言入行不久便拍攝五部電影，相當幸運。問到會否向緋聞男友郭富城請教演技？她說：「我當佢係前輩，絕對唔係咩『新城嫂』，唔想影響到人哋。」