畢業自演藝學院的女新人賴慰玲（Winki），新劇中飾演「少女張慧儀」，演出備受讚賞！身為七位少女演員的大家姐，Winki對好姊妹照顧有加，指若有姊妹嫁唔出，會照顧對方一世！

Winki首次拍劇，將多年來所讀的演技理論盡情爆發。

賴慰玲（左）與張慧儀同演「珍妮」，自言與角色性格相似，主動又率真。

賴慰玲與一班《女人俱樂部》姊妹感情要好，更豪言要好好照顧她們。

無綫劇《女人俱樂部》捧紅多位少女演員，當中「少女張慧儀」賴慰玲所飾演的「珍妮」性格主動、巴辣及率真，個性鮮明突出，獲得不少觀眾喜愛！

Winki與其他少女演員「糖妹」黃山怡、陳嘉寶、吳嘉熙、吳燕安、王敏奕及陳瀅因拍戲而義結金蘭，「大家姐」Winki戲內戲外甚有領導才能，還豪言會好好照顧姊妹：「我結拜時話邊個冇人要，我就攬上身，我『娶』咗佢囉！同我住啦！（平日都咁有義氣？）係o架！鍾意抱打不平，幫朋友出頭。」她透露拍劇時最難忘要穿泳衣及在荒山野嶺玩「碟仙」，自認與吳嘉熙最大膽：「我哋兩個玩咩都行先，好彩當日冇遇到靈異事咋！」首次拍劇的Winki直言感覺特別，七姊妹經常捱通宵攬住瞓，猶如中學宿營：「有時拍通宵廠景，中間有兩個鐘休息，我哋就攬住一齊瞓，有人話唔捱過夜唔叫拍過劇，依家感受過喇！」

「演戲最緊要求真」

Winki三年前於演藝學院戲劇系畢業，擁有豐富的舞台劇經驗，還經常跟姊妹討論演技：「大家各有擅長嘅嘢，我演戲經驗比較多，佢哋睇完劇本後會諗幾個演繹方法問我意見。（舞台劇同電視劇好唔同？）拍劇能量要收斂啲，亦要留意攝錄機位置，我讀過唔同演技理論，點都有幫助，但演戲最緊要求真，咁先感動到人！」