陳蕊蕊愛得坦蕩

美味天使出身的「柑桔」陳蕊蕊，身材惹火兼外表女性化，是不少男士心目中的理想對象，可惜早已被台灣過江龍金剛「私有化」，二人拍拖近一年，感情穩定。以為蕊蕊是小鳥依人型，但原來她相當男仔頭，她自爆求學時期的粗魯事迹：「中學同男仔打交，嗰時好曳，同啲男仔玩，成日一齊踢足球同打籃球，試過同男仔踢波，得我一個女仔，當時都15、16歲，同一個好高大嘅男仔搶波，點知兩個撞埋一齊，我真係彈開十呎再碌地！真係拍戲咁，我碌咗幾下，半身損晒，對腳都有少少疤，面就冇。」沒有最粗魯，只有更粗魯，她續說：「試過踩板，我太貪玩，喺斜路『Sir』落嚟，好唔正常咁踩，點知煞唔切掣，成個人趴落塊板度，塊板又繼續去，嗰次塊面損晒，牙又崩咗。」她坦言現時一棚靚牙只是牙套，那一次她還弄傷了下巴，她猶有餘悸地說：「嗰時好驚，都大個啦！成16歲，仲要啱啱開學，嗰兩個禮拜返學都要攞手同攞紙巾遮住，嗰時唔興戴口罩，都好驚有疤，好彩係皮外傷，我不停搽藥，得閒上堂又搽，好彩一個月甩晒焦就冇事，冇傷到好深層。」

自覺脾氣大

問到金剛是否被她這種男仔頭個性吸引？蕊蕊甜絲絲地說：「佢都話我係真啲，佢好怕嗰啲作狀嘅人，人前人後兩個樣。」她亦自覺是個不懂講大話的人，所以拍拖選擇了公開：「收埋好辛苦，我好怕講大話，我好冇記性，會唔記得自己講過咩。」仍處於熱戀期的蕊蕊更大讚金剛是個浪漫的人：「佢好照顧人，可以話係廿四孝男友，連我兩隻兔仔都幫手湊。」她還自爆脾氣很大，金剛卻對她千依百順，每次她發脾氣，金剛也會轉過來哄她。看來金剛冧女的確有一手，難怪緋聞不斷，分別與「豬扒港姐」張嘉兒、「神獸天使」蔡慧欣等扯上關係，對於男友的過去，蕊蕊自言不會呷醋：「其實我知嘅，佢嘅緋聞真係只係緋聞，佢話我係佢喺香港第一個女朋友，佢講得我就信嘅，同埋緋聞嘅嘢可信性唔高，真係一齊嘅就要信對方囉！」

提到金剛對她做過最浪漫的事，蕊蕊繼續冧爆說：「好多位都好感動，我諗生日囉！嗰次我返台灣，我哋唔喺香港過，佢就特登請埋我啲朋友過嚟畀驚喜我，我唔知嘅，佢畀埋錢請朋友過嚟，我感動到想落淚，但忍住，唔想喺咁多人面前喊。」談到對方是否她的結婚對象？蕊蕊坦言已經大個女，拍拖都想長遠發展，她說：「唔係玩玩吓嗰啲，如果玩玩吓就唔會嘥時間，都係諗有將來先會一齊，但冇刻意去計劃結婚，感情穩定就會結，冇話真係傾，大家一齊好夾。」

未試過下廚

金剛對蕊蕊呵護備至，問到有沒有把她寵壞？她笑說：「我覺得未，可以再寵啲，咁快壞咗就唔好。」這是幸福女人才說得出的話，至於對男友做過甚麼窩心的事，她也要「努力」回想：「佢生日我都會諗吓點做，以前嗰啲（男友）就唔會，因為我覺得女仔要矜持啲，覺得對人太好唔得，會慣咗同埋唔珍惜，但佢我反而會諗畀咩驚喜，不過我又唔識煮嘢食，我怕洗碗。」她笑言未曾為金剛下廚：「公仔麵都好似冇，因為我話我煮啦！但到煮嘅時候我就問佢點開爐呀？電子爐我唔識用，係咪要落呢樣先？問多兩句佢就會話等佢嚟，佢都睇唔過眼，可能驚我整完仲衰啦！佢呢個係聰明選擇。」

呷醋睇心情

蕊蕊自爆是個超級懶惰的人，連呷醋也要睇心情，她說：「有時太懶我就懶得理佢，乜都唔想理，佢去邊我都唔理，個腦乜都唔諗，想自己一個喺屋企打機，懶得呷醋。」但她笑言如果心情欠佳的日子，很細微的東西也會看不過眼，她笑說：「心情唔好就乜都可以講，女仔就係咁啦！」相反金剛是一個易呷醋的人嗎？她說：「一時時啦！佢OK嘅，我好黐屋企，好少出去玩，男性朋友都唔多，我真係好懶，唔想出街應付一啲唔熟嘅朋友。」向男友大派定心丸！

後記：管接管送鐵漢柔情

鏡頭前，金剛對蕊蕊一往情深，鏡頭後，他對女友亦呵護備至。當日約蕊蕊在戶外做訪問，金剛親自送女友到場，跟蕊蕊說話時又輕聲細語，表現出鐵漢柔情一面，與螢幕上的搞笑形象截然不同。而每次提到男友，蕊蕊亦笑意盈盈，熱戀情侶的甜蜜，與晴天太陽一樣普照。