名模Mandy Lieu師妹Geri S去年來港發展，擁有南非及日本血統的她，日前學整日式綠茶蛋糕，希望用美食綁實男友個胃，實行入得廚房，出得廳堂！

平日愛煮南非菜的Geri表示，男友非常滿意她的「作品」。

身為美女的Geri入得廚房，有樣有實力！

Geri聽足老師指導，完全冇雞手鴨腳！

混血模特兒Geri S擁有南非及日本血統，去年被護膚品牌睇中拍廣告，留港發展的她雖然非常熱愛香港，但她希望能感受「家鄉」風味，故日前專誠學整日式綠茶蛋糕。

首次整蛋糕

Geri跟隨老師的指導，篩粉及打蛋時未有雞手鴨腳的情況，蛋糕出爐後，她便加上黑豆及金箔裝飾，最後大功告成！問到Geri平日可有下廚習慣，她坦言從小就愛下廚：「細個已經有本Cook Book，以前喺南非會跟長輩入廚房，睇佢哋煮得多，好自然就對入廚產生咗興趣！」

她又表示平日最愛整曲奇餅，但整蛋糕卻是第一次：「今次好好玩，感覺好新穎，整蛋糕都唔係好難，返屋企應該會練多幾次整畀朋友食！」閒時會在家弄南非菜的Geri，坦言會跟男友在家撐枱腳，實行用美食綁住男友：「平時都有整南非菜，煮畀自己食，人都健康啲！（煮畀男友食？）經常整畀佢食，佢好鍾意食我整嘅嘢，仲讚好好食添！」