中日混血主持人周子駒（Cyrus）向來是美食達人，拿手小菜多籮籮的他，更吸引蒙嘉慧和鄭融黐餐！他心癢癢獻技殺入商界，即席示範整三文魚他他及焦糖布甸，賣相與真正大廚「有得揮」！

煮得一手好菜的Cyrus透露，當初下廚全為「求生」！

當初煎豬扒煎到一鑊燶的Cyrus，今時今日已是美食達人！

Cyrus即席示範整焦糖布甸，有板有眼！

鄭融與Cyrus老友鬼鬼，閒時更會作客「黐餐」。

美食達人Cyrus自爆15歲時曾是170磅的肥仔，當時的身形給人的第一印象就是「為食」，由於父母經常外出工作，獨留在家的他開始涉足「煮飯仔」，他笑言下廚初衷為「求生」：「細個煮嘢食係求生技能，因為父母唔喺屋企，我要湊埋細妹，如果唔整嘢食就冇得食，所以作為哥哥，我點都要煮飯。記得有次煎豬扒落咗好多糖，搞到成塊扒燶晒，但妹妹竟然話好好味，令我好感動！」

計劃開餐廳

今時唔同往日，Cyrus煎的豬扒不再是一舊炭，其拿手小菜更多到數唔晒，還吸引好友蒙嘉慧及鄭融作客！為一展「廚房男」實力，他更即席示範三文魚他他及焦糖布甸！他先把香草、三文魚及香葱切碎，再加入檸檬汁及法國海鹽，最後把材料放到焗脆的麵包片上，話咁快就完成第一道小食！Cyrus接着將沙糖煮成焦糖，將焦糖鋪在餅底後，便着手煲雲呢拿豆及牛奶，把牛奶加入蛋醬再擺入焗爐，最後將餅模反轉放碟，成功燉出震騰騰布甸，賣相一流！所謂煮而優則「商」，下廚有一手的Cyrus表示有興趣開餐廳：「一直都好想有間屬於自己嘅餐廳，Size大定細、整咩國嘢食都冇所謂，但應該唔會自己煮，不過做生意要計劃周詳，都要認真部署吓！」