在無綫新劇《流氓皇帝》中與周麗淇（Niki）有咀面戲的馬國明，昨日坦言唔夠喉，希望追加咀嘴戲，但遭Niki斷然拒絕！Niki笑馬明的追女招數老土，卻得戚地表示有令馬國明乖乖「嗒糖」的妙法。

Niki嘲笑馬明的追女招數老土，睇嚟馬明要自我檢討一下喇！

Bob（左起）、王祖藍及小寶在新劇中合作愉快。

馬國明（馬明）、周麗淇、王祖藍及小寶等昨日在電視廣播城拍攝劇集《流氓皇帝》，只見馬國明疲憊不堪，在化妝間內瞓到擘晒口，但一到訪問他便回復精靈，並坦言因趕拍劇集，故只睡了兩、三個鐘。他又提到之後會到佛山拍攝外景兩個星期，他坦言怕內地伙食一般，屆時會準備很多杯麵。他又指劇中有場須當街寫大字的戲份，更要有九龍皇帝的獨特風格，故會找「替手」代寫。此外，馬明又自爆不停要求加插與Niki的咀戲，卻無奈地遭Niki拒絕，慘食檸檬！

型男「嗒糖」有妙法

而Niki被問到此事時即指真有其事，更笑言馬明經常要加咀戲：「我第一次同佢合作先知原來佢係咁，本身以為佢係『天然呆』，佢第一次哄到好埋同我講嘢嗰陣，搞到我成塊面都紅晒，好尷尬！」記者即建議她不如給馬明錫一、兩次「應酬」他，她聞言即說：「咁又唔得！我怕會傳緋聞！」又自爆已經準備絕招：「就係請佢食糖，佢見到包糖雙眼就發晒光。」其後她又大彈馬國明識女仔的招數既舊又悶，難怪一直單身。