草蜢、錢嘉樂、謝安琪（Kay）及黃翠如等參與無綫真人騷節目《快樂聯盟》，每集要面對突擊挑戰，真性情表露無遺！日前他們學習求生技能，兩位「宅男女神」Kay及翠如穿短褲晒腿，落力踎低紮竹筏，宣揚節目的正能量訊息！

拎起船槳學划獨木舟的Kay一臉認真，英姿颯爽！

翠如跪地紮竹筏，不慎磨損腳板呀陰功！

未知張智霖出場時會帶來甚麼驚喜？

多位星級主持拍住上划獨木舟，男女大混戰！

Bob（右）及羅鈞滿（左）大讚節目有教育意義。

跳唱組合草蜢、女歌手謝安琪、藝人錢嘉樂、黃翠如及搞笑主持Bob（林盛斌）等最近參與無綫真人騷節目《快樂聯盟》，每集要攜手解決未知的挑戰，考驗體力、創意、口才及各方面知識，最真實的反應表露無遺，如同跟觀眾一同歷險！眾星通街跑、捱眼瞓、學新技能，可謂身心俱疲，但能以歷奇玩樂形式帶出資訊及正能量，他們均大讚別具意義！

損手爛腳捱餓

日前他們聯同藝員羅鈞滿晨早到西貢訓練營學習野外求生技能，即場紮竹筏及划獨木舟，嬌滴滴的兩位女將非常落力，穿短褲的Kay踎地綁繩，翠如則磨損腳板！體力勞動一輪到放飯時間，因他們下午要流落荒島，五分鐘內碟碟清，大食慣的Bob唔夠喉扁晒嘴，瘦削的翠如亦表示未夠飽，場面搞笑！

Kay大讚節目有意義：「我嚟露營囝囝都想玩，等我學識咗再帶佢去！」提到體能需求甚大，Kay雖被鋒利剪刀刺傷手狂流血，但仍表示無悔參與：「面對突擊挑戰，都係一種開心嚟！（你負責邊部分？）我比較冷靜，每步都會諗清楚，係個好嘅聆聽者。」而第三集加入的翠如表示很擔心突擊任務：「我畏高、唔識游水！不過大家有唔同長處，我EQ高成日笑，可緩和氣氛，又去過非洲、南美，識得啲求生技能，知道荒島有咩草可以食。（紮筏辛苦？）都OK，蘇老闆（蘇志威）幫咗我好多。」

十集的《快樂聯盟》Gimmick甚多，出動拍攝人員更比平常的綜藝節目多幾倍，監製陳旭亮安排眾星上天下海，感受最新高科技，又要到懷舊屋邨回味60年代事物，期間難關重重！多位星級嘉賓包括張智霖、伍詠薇、谷德昭、C君、森美、小儀及梁烈唯等更會輪流出場，以提升任務難度，令節目更過癮刺激！節目將由本周起每逢周日晚上九時於翡翠台播映。