鄭多燕跳唱會滯銷班韓星救亡

有「亞洲塑身女王」之稱的韓國美魔女鄭多燕，憑健康塑身舞愈跳愈索、愈索愈紅，但仍未能為本月9及10日、一連兩日在灣仔會展舉行的《鄭多燕萬人熱辣Show》跳個滿堂紅。據悉跳唱會雖有阮兆祥、陳嘉佳（細細粒）、楊詩敏（蝦頭）「喪跳」力撐，但銷情欠佳，至今只售出三成門票。而今次鄭多燕酬金高達7位數，總成本達數百萬元，料令主辦商蝕近200萬元！

同鄉願無酬義演

主辦商密謀「救亡」大計，力谷宣傳及增加表演內容，以刺激門票銷量。據悉主辦商馬天尼集團董事長孫敬安早前到韓國時，亦有數間知名的韓國藝人事務所願助一臂之力，無酬義演，包括韓國人氣組合Girl's Day、Davichi等。原來鄭多燕在韓國甚有地位，因她的健康舞形象健康正面，亦是圈內前輩，故有不少事務所得知她跳唱會滯銷後，希望能出一分力。

昨日記者致電孫敬安時，他坦承現時賣飛情況並不理想，但跳唱會內容將更加充實：「會有祥仔扮Psy跳舞，細細粒亦會獻唱《終身美麗》，而蝦頭亦會獻唱《跑步機上》。演唱會一向事前好少公布表演內容細節，但依家銷情唔理想，惟有公布節目設計細節，希望刺激更多觀眾買飛入場。」

問到是否獲韓國藝人事務所無酬義助？孫敬安說：「係有幾間事務所願意免費提供歌手，但因為跳唱會時間有限，唔可以超時，加上節目早已經編排同決定好，最後只好婉拒。」他又再三答謝對方好意：「呢件事令我深深體會到韓國藝能界有佢嘅國際地位，除咗藝人有質素、訓練充足、組織完善之外，就係韓國藝能界好團結、好齊心，令我好感動！」

孫敬安又稱即使銷情未如理想，亦會盡力將跳唱會做到最好：「咁樣係做跳唱會嘅誠意，係對買飛入場嘅觀眾同贊助商有交代。（實際賣飛情況如何？擔心蝕錢？）目前統計嚟講賣唔夠一半，但製作演唱會係長線投資，有賺有蝕，唔會將眼前輸贏睇得好重，最重要係做好同做足。」

另外，昨日記者致電監製錢國偉，他說：「本身已經有Super Gear成廿幾位少女表演，佢哋仲會同鄭多燕一齊跳舞。」