向來愛以背心短裙示人的官恩娜原來相當保守，她昨日出席活動時坦言甚少以比堅尼示人，初入行時更因公司要求她以比堅尼上陣拍攝月曆而喪喊，最後更要用布遮掩下身，總算力保不失。

身穿彩色連身裙的Ella，即場幫謙仔換衫。

Ella及謙仔向途人派曲奇餅，大受歡迎。

華納歌手官恩娜（Ella）與羅仲謙（謙仔）昨日現身時裝活動，Ella即場為謙仔換衫，其後二人又走到街頭向途人大派曲奇餅。以彩色連身裙示人的Ella表示，以前喜歡黑色，近幾年才開始愛上繽紛色調，不但令心情變好，運程也跟着變好，她笑說：「我屋企嘅梳化都係粉紅色，我隻狗雖然係仔，但所有用品都係粉紅色。」

Ella又表示即使出海也喜歡作近似的打扮，甚少以比堅尼示人：「因為我冇自信，見到啲女仔着比堅尼覺得好大膽，我又唔夠弗，我會喺比堅尼外着背心短褲。（冇試過行泳衣騷？）我邊有人請呀！公司都未必主張我行，我寧願努力工作都唔想着三點式，唔想喺人前暴露。」她又表示初入行時公司要求她以比堅尼上陣影月曆，令她喊爆：「公司同我做咗好耐心理輔導，大家拉鋸咗一輪，最後我要用塊布遮住下身，力保下身唔可以暴露。」她指唯一一次在人前着比堅尼是在法國，當地人甚至沒有穿上衣：「佢表現得好隨意，仲要胸前偉大，我控制唔到唔望，望到人哋都唔好意思，要着番件Top，我都即刻着番條短褲。」

謙仔期待女友着泳裝

至於謙仔透露從未見過女友楊怡穿泳裝，並表示十分期待。問到母親節會否帶楊怡與母親慶祝？他笑言平時甚少跟家人相處，故要獨佔母親，並指母親也想獨佔他。禮物方面，他表示早已構思好：「有兩樣嘢要預備，一樣係唔使錢買嘅，例如心意卡，第二樣係物質嘢。（會唔會送埋畀楊怡媽咪？）母親係好偉大，要尊敬，我會送。」並表示會向楊怡打探伯母喜好。