為一包煙發火，歌神千里尋「兇」！陳奕迅日前遊日時在便利店買煙，怎料被店員起底兼公開閉路電視的圖片，嬲到返香港的他自爆曾折返找這位「平民狗仔隊」理論，對方更被嚇到「笠水」！

遊日被偷拍的Eason餘怒未消，主動提起事件時講到指手畫腳。

為谷新碟，Eason半裸被水狂射，又打造下體插羽毛的「迷你臣」人像。

下體插羽毛的「迷你臣」人像

陳奕迅（Eason）早前與老婆徐濠縈拍拖到日本旅行，在當地便利店買煙，被華人店員認出，並將他買煙時的閉路電視圖片公諸於世，即時辣着Eason，在微博鬧爆這位「平民狗仔隊」粉絲做法無理。餘怒未消的Eason昨日出席活動時主動重提「閉路事件」，自爆曾折返找該名店員理論：「其實有諗過私信畀上載張相嘅人，但都係公開畀大家討論好啲，我有返便利店搵個女店員，但可能佢嚇驚咗，唔喺度。」他又重申發微博教訓這位粉絲的目的是希望大家討論何謂責任、何謂尊重，但揚言事件不會影響心情。

對於有指經理人陳家瑛退休，由電台前高層甘菁菁接棒，Eason說：「陳家瑛簡直係我阿媽，合約上分開，但關係仍然好密切。（同甘菁菁合夥開公司？）呢啲遲啲先講。」談到專程從重慶趕回港出席何韻詩爸爸（菇爹）開辦的藝術學校開幕禮，他表示菇爹曾幫助他很多：「雖然冇上契，但都會叫契爺，甚至係我另一個姓嘅老竇！」問到可會讓愛女康堤報讀藝術學校？他說：「啱都會報讀。」

「裸」膽小便

另外，Eason早前為國語新碟拍攝封套，為呈現沖涼的感覺，他半裸上陣不斷被水喉狂射。而創作總監林海峰特別為他打造只有2呎高的「迷你臣」，全裸人像的下體插着羽毛，認真搞鬼！至於有「肯雅徐」之稱的阿徐與鄭融到美國跑馬拉松，還在白宮前拍照留念。