張智霖:男仔係鍾意呢啲
張智霖(Chilam)近年工作不斷,疑患上焦慮症的他不惜揈錢減壓,日前被《好報》拍得速試價值450萬元的法拉利,並立刻扑錘購買。Chilam昨日笑指每個男士都喜歡跑車,並自覺情緒沒有問題,正集中火力為個唱鍛煉,惟紅館檔期爆滿未能再加場,只能3場止步。
Chilam被《好報》影到在銅鑼灣試車。
Chilam笑指老婆靚靚沒有哦他買車。
Chilam細心研究辣跑,不時詢問經紀意見。
人氣急升的Chilam向來對跑車有研究,再加上排山倒海的工作令他財源滾滾,即使花數百萬買辣跑仍應付有餘。近日正籌備7月紅館個唱的他,簽下多部片約,忙到有氣冇碇抖,又要親力親為參與個唱流程、揀歌及效果,每天回家後便匿埋度橋,令他變得過分緊張,試過夜闌人靜時致電工作人員作流程修改。
賣飛情況理想
Chilam在日復日的壓力下終於爆煲,近日疑患上焦慮症,以揈錢宣洩壓力,豪擲450萬買入全港暫時只有一部的法拉利458 Speciale辣跑,日前他被《好報》直擊到銅鑼灣試車,揸慣靚車的Chilam對辣跑細心研究,期間不停詢問經紀意見,及後更親身坐上司機位撻匙,踩油門絕塵而去,享受辣跑帶給他的快感。
對於疑似患上焦慮症,Chilam昨日接受電話訪問時哈哈大笑:「我依家非常之歡樂,不過工作壓力下,我係會做好多運動去化解,依家都做緊運動啦!冇咩事喎!(老婆冇哦你買車?)冇啦!男仔係鍾意呢啲,女仔就鍾意第二啲。(真係買咗?)呢啲就唔好講啦!(450萬好貴喎!)呢啲都要睇自己情況。(你綽綽有餘?)唔好講呢啲啦!」正準備演唱會的他透露,現時每日也有參與開會:「今次玩立體視覺效果,賣飛情況都幾理想,可惜同紅館申請咗兩次都加唔到場,只得3場。(開Part 2?)試過申請其他月份,但今年都爆晒,明年我有幾部電影,所以呢兩年都應該進行唔到。」