樂壇天后Katy Perry被美國小報指她與前歌手男友John Mayer分手後數臭他的「何B仔」，嘲笑其形狀奇特之餘，又大爆John愛用蜜蠟脫毛，認真冇品！

美國小報《國民問詢報》（National Enquirer）聲稱收到天后Katy Perry的友人爆料，指Katy與歌手舊愛John Mayer分手後，即向友人數臭John及狂踩他的中性打扮，甚至嘲笑其「老二」形狀太小！友人說：「Katy經常話John愛用蜜蠟脫毛同着開胸羊毛外套，又話佢下面好得意，同佢以前見過嗰啲唔同。Katy仲話John嘅護膚品比自己仲多，而且照鏡嘅次數比佢任何一位女性朋友都多。」不過，友人亦力撐Katy，指她現在的報復心態並不是原本的性格：「佢唔會畀拍拖擾亂依家嘅生活，佢好開心回復單身，想做一啲吸睛嘅騷，佢需要專心去做一件事，暫時唔想搵男友。」

另外，Katy 的服裝設計師好友Johnny Wujek向傳媒大爆兩人於2006年在派對認識的經過，他指當時Katy一眼看上了他，但身為同志的他卻對Katy的男性朋友較感興趣，而Katy還直接問他喜歡自己還是其友人，兩人自此變成好友兼好拍檔。

羅拔Rita傳撻着

另外，電影《吸血新世紀》（Twilight）男星羅拔柏迪臣（Robert Pattinson）與女歌手Rita Ora一星期內兩次公開現身，並於前日孖住出席Sam Smith演唱會，即被傳撻着。但亦有人爆料指他們因同是Sam的忠實粉絲，而且一樣是英國人，所以分外投契。