影壇新貴蔡潔於處女作中與影帝曾志偉床上肉搏，事前灌酒壯膽的她，拍了45分鐘便「斷片」！為新片獻出「第一次」的她表示毫不尷尬，還大讚志偉Gentleman兼懂得照顧人。

首次參演電影的蔡潔便要赤裸上陣，認真搏到盡！

蔡潔大爆在拍攝床戲前灌了一支紅酒壯膽。

影壇新貴蔡潔將在戲中與志偉埋身肉搏，令人期待！

早前蔡潔在處女電影《香港仔》中，首次與曾志偉合作便大玩婚外情，兩人更不乏床上肉搏戲，私下唔蒲唔酒的她透露，事前喝了整支紅酒壯膽，結果拍攝中途「斷片」被抬走，要第二日再拍過。蔡潔解釋並非因驚同緊張而喝酒，而是導演彭浩翔希望她有微醺的感覺，惟她「飲過龍瞓着咗」：「據聞拍咗九個字就不省人事，佢哋安排咗個地方畀我休息，本來大家諗住等我醒，但志偉話『唔好等喇！佢實醒唔到！』，醒後我問番同事發生咩事，真係人生第一次！我即刻打電話講對唔住，其實都幾唔好意思，要增加大家負擔！」

床上肉搏唔尷尬

戲中的她疑似「全裸」與志偉又攬又錫，她澄清：「其實我只係裸背，前面有做好保護措施，係導演鏡頭就得靚啫！」提到志偉面貼其胸，她即表示毫不尷尬：「唔通隔到好遠咁咩！當你投入角色時，你會覺得一切都好自然，志偉係個好Gentleman嘅人，平時好照顧人、好有禮貌，令大家都好Relax。反而我覺得最輕鬆係呢場，因為導演幾個月前已經講咗，無形中有心理準備，當時我都一口應承，完全冇猶豫！」談到這場床戲意識大膽，她坦言曾致電父母試探口風，豈料兩老均思想開放：「佢哋話只要劇情唔低俗或者好似成人電影就得，一個好演員唔應該計較，當時聽到好感動好想喊！」

面對影帝兼大前輩的志偉，蔡潔坦言「超級無敵緊張」，拍攝首場戲便驚到六神無主兼「心震」，不過事後她也獲導演及志偉大讚專業及達到要求。