藝人鄭嘉穎昨日穿Shocking Pink西裝出席《KFC點醬雞棒魔幻派對》，早前右腳韌帶受傷的他表示下月會為無綫新劇《天眼》開工：「頭一個月以文戲為主，第二個月先有動作戲，因為我傷韌帶都幾麻煩，如果唔係之前以為好番走去打咗場波，都已經斷咗尾，打完波之後就腫到好似西瓜仔咁，應該仲有兩個月先好番。（劇集有危險場口？）未有劇本，但槍戰少不免，跑跑踢踢都一定有！」

鄭嘉穎與張曦雯你一言我一語，兩人言談甚歡！

對於有指香港演員為北上搵銀而狂拍爛片爛劇，嘉穎表示很多因素並非演員可控制：「拍每一套劇之前係唔會知得唔得，冇人會想接爛劇，但亦唔係話想拍好劇就有得拍。」談到香港拍劇的演員都熟口熟面，他笑言已在TVB工作逾十年：「好難有演員未合作過，演員永遠都係一代接一代，要等新一代演員冒起就會有新鮮感！」