劉嘉玲及甄子丹昨晚在《亞洲電影特別大獎頒獎禮》雙雙獲頒「傑出亞洲演員大獎」，為大會擔任評審的嘉玲不肯透露是否投了老公梁朝偉影帝一票，堅持賽果到本周四頒獎禮上自有分曉。

齊奪「傑出亞洲演員大獎」的劉嘉玲及甄子丹封口避談投票意向。

劉嘉玲及甄子丹昨晚現身金鐘亞洲協會香港中心，出席《亞洲電影特別大獎頒獎禮》，雙雙獲頒「傑出亞洲演員大獎」，晒長腿配以閃爆金色西裝造型亮相的嘉玲，與子丹合照時心情大靚，互相吻賀，她更暢談得獎感受：「好開心，獎項係對演員工作嘅肯定，令事業做得更好。（今後拍多啲戲？）唔會特登，其實（得獎）係我好彩啦！但都有付出好多，成功一定要付出。」

她又透露為大會擔任評審，雖然老公梁朝偉亦在候選影帝之列，但她強調會以公正態度投票：「睇咗好多戲，已經投咗票。（投畀偉仔？）我好公正，以客觀態度投票。不過我諗今時今日都冇人會話梁朝偉做戲唔好，平時佢都要求我用客觀態度同佢講戲經。（偉仔再鬥金馬影帝李康生感壓力？）每個演員都需要鼓勵，李康生真係做得好，角色好難做，佢做戲好多年，應該畀啲肯定佢，其實候選者個個都實力強勁。」

子丹攞獎唔慶祝

子丹亦拒絕透露投票意向，他說：「我唔可以透露我投咗咩票，今次係3個機構一齊做，好公道。（偏心香港代表？）搵得我就公平公正，如果香港代表得獎，我會開心，但我評分好公平。」而對於獲頒「傑出亞洲演員大獎」，他說：「我攞獎唔會興奮到跳起，只會繼續工作同生活，我冇打算同太太去慶祝。（得獎實至名歸？）我希望係啦！（挑戰難度更高角色？）我每套戲都做到最好，以前我會大膽豁出去嘗試，將來都會！」