鍾嘉欣驚死寫遺書示愛
鍾嘉欣早前趁假期返加拿大探親，歎足三個星期的她，豈料回程時遇上足足五小時的氣流！嚇到魂飛魄散的嘉欣自爆寫定遺書，向家人及朋友示愛，幸好最後客機安全着陸才鬆口氣！嘉欣男友伍允龍事後亦知此事，強調最緊要人冇事，認真冧爆。
鍾嘉欣講番九霄驚魂經歷，自爆以為死硬寫定遺書，認真一額汗。
伍允龍知道女友機上遇險，但未有向他哭訴，夠晒堅強！
剛從加拿大探親返港的鍾嘉欣，昨日以透視裝短裙出席保育海洋活動，引來大批粉絲舉牌撐場。自言喜歡海洋世界的她又呼籲大家保護瀕臨絕種的生物，她雖不諳水性，但試過兩度潛水，笑言不明為何拍劇經常有落水戲：「我都想學識游水，咁拍劇就唔使咁多限制！」記者提議搵男友伍允龍教，嘉欣即尷尬地指對方亦不懂游水。
杯又爛成地水
昨晨7時才落機的嘉欣，受訪時笑言在溫哥華歎足三星期：「今次返去主要探親，同埋調理吓身體，我覺得每年都要搵時間平衡生活，做個成功女人，家庭同事業觀念同樣重要。（未結婚都算成功？）呢樣實有機會做嘅。（計劃結婚？）唔知啊！」問到男友可有求婚，她又尷尬地表示沒有。面對記者連番追問感情事，嘉欣即扯開話題，自爆遇上九霄驚魂！
嘉欣透露返港時，飛機遇上氣流長達五小時，機艙一片凌亂，更嚇到寫定遺書：「返嚟嗰陣遇到氣流，從來未試過咁驚，杯又爛，搞到成地都係水。我驚到自己寫定遺書，如果有咩事，希望張紙條畀屋企人睇到都開心，內容係同Daddy、媽咪、阿哥、家姐、朋友講『I Love You』，要珍惜生命，唔好為小事而煩惱。嗰五個鐘我勁提高警覺，仲係咁背熟求生知識，點着教生衣。」問到為何不找男友伍允龍接機，她則笑而不語。雖然剛「死裏逃生」，但嘉欣表示下月仍要飛：「氣流呢啲嘢好難講，唔驚得咁多。」她又笑言落機第一時間想瞓覺，皆因在機上時刻提高警覺，搞到冇覺好瞓。
伍允龍冇安慰
嘉欣嚇破膽，男友伍允龍昨日接受電話訪問時表示已知此事：「嘉欣有同我講，佢驚都好正常嘅，咁女仔比較感性，我都好明白佢當時嘅處境。（向你哭訴？）咁又冇，淨係講番件事出嚟。（點安慰佢？）都冇，佢冇事就得啦！」問到可有乘機求婚，他則笑笑口避談：「最緊要人冇事！」他又讚女友懂得利用經歷鼓勵大家珍惜生命。
