喜劇電影《盜馬記》昨日於北京舉行首映，影帝梁家輝、陳慧琳（Kelly）、曾志偉及王祖藍均現身支持，Kelly更被發現額頭上有道近兩吋的傷痕！問到傷勢時她稱無大礙，其後又在電話訪問中說：「我前晚執行李時撞跌咗塊化妝鏡，我畀鏡角割到額頭，但冇睇醫生。（痛到喊？）痛到癲都忍住唔喊，因為囝囝喺隔籬，想教佢勇敢啲！不過化妝都驚令傷口感染發炎，仲要戒口！（驚破相？）係！驚有疤呀！不過冇辦法，要等到下星期香港首映先返到嚟。」

Kelly昨日出席首映時額頭明顯有近兩吋的傷痕，睇見都痛！

同場的曾志偉及王祖藍則「唱雙簧」寸爆梁家輝，祖藍先向影帝「賣口乖」稱對方為偶像，而志偉則大爆家輝愛對劇組每個人的戲指手畫腳。