名模諸葛紫岐（Marie）與老公Neway二太子薛嘉麟昨晚為囝囝Arthur舉行百日宴，BB由秘密通道進入會場避過鏡頭，全程Sweet爆的Marie不時依偎在老公肩膊上，幸福滿瀉！

Marie和薛嘉麟拖手出席囝囝的百日宴，幸福滿瀉！

囝囝Arthur

滿面笑容的鄭融手持禮物參加百日宴。

剛從巴黎返港的JM兩手空空，原來忙到未得閒買禮物。

諸葛紫岐去年12月誕下Arthur，昨晚為剛滿百日的囝囝舉行百日宴，在金鐘酒店筵開二十餘席，不少圈中好友如黎明愛將文詠珊（JM）、鄭融、陳曉東和HotCha等均有出席，昨日微博流出多張場內照片，會場以粉色為主調，並用彩色氣球布置，台上放有多張家庭照，可見Arthur眼大大肥嘟嘟，還梳了個「碧咸頭」！每位嘉賓都收到三粒馬卡龍擺設作回禮。

昨晚六時許，穿紅色RED Valentino連身裙的Marie與薛嘉麟十指緊扣到達酒店，問到為何不見BB？薛嘉麟笑說：「佢自己嚟啦！大個仔啦！（中文名叫咩？）佢有名喇！叫住BB先啦！佢嚟到自己答啦！」兩夫婦更不時互冧，提到Marie已完全收身，老公即搶答：「仲Fit過之前！」問到BB是否難湊？薛嘉麟說：「幾好湊，最緊要媽咪教得好。（似邊個多啲？）似媽咪。」Marie即指着老公說：「超似佢！眼神同樣似爸爸，笑就似我，係活潑BB。」薛嘉麟稱BB甚麼也想看和玩，聽故事時會一臉認真：「我覺得佢識聽！」問到BB黐邊個，Marie說：「梗係黐我！」又冧爆地依偎在老公肩膊。問到會否再造人？薛嘉麟說：「呢個要問囝囝，問吓佢想唔想要細佬妹，唔可以咁自私，淨係顧住大人。」Marie表示最高興是九十多歲的太爺，因為BB是他第一個曾孫。

JM「折現」當禮物

到賀的JM則表示剛從巴黎返港，未有時間買禮物，故送上現金作禮：「我今日實際啲折現，之後會補番禮物，想買啲畀BB咬嘅嘢！（有冇見過BB？）冇，都係間唔中睇微博先見到Marie動向。」問到在巴黎期間有否與緋聞男友謝霆鋒見面？她說：「冇，做完嘢留咗幾日，去咗阿姆斯特丹。今次巴黎之行幾好，可以叉吓電！」她又指黎明亦在巴黎，但沒有時間見面，故未洽談續約一事。