好食男最啱李曼筠七年之癢

李曼筠於2006年入行，不經不覺已在娛圈打滾了七年多，她笑言本來無意入行，偏偏無心插柳下，因一個動漫節而促成事業發展，令她始料不及。在娛圈工作超過七年，她笑言自己仍是「傻更更」，每天都很樂天：「不過入行之後的確遇過好多好複雜，好難解決嘅問題，加上我個人有啲完美主義，樣樣嘢都想做到最好，但現實係要好多外在因素配合，控制唔到，以前我會唔開心，但大咗學識放低，冇咁執着。」在工作上遇過不少困難，令她學識如何開解自己：「食囉，好彩我係食多多，但肥少少嘅人，唔怕肥！」

26歲始有真姻緣

7年前跟男友分手後，一直專注事業的李曼筠赫然發現竟有「七年之癢」，開始恨拍拖：「以前唔覺，做嘢好開心，好充實，又有貓陪我，但最近真係想拍拖。」她坦言七年來不乏追求者，但一直堅持不拍拖的原因竟然是因為堪輿學家麥玲玲贈她的一番話：「麥玲玲師傅話我26歲先有真姻緣，就係因為呢句，我索性疊埋心水等到26歲先算！」無獨有偶，今年她將會踏入26歲：「係呀，所以今年會放開啲，唔會咁抗拒識男仔！」

談到心中的理想情人，李曼筠希望另一半最好是「好食男」：「孝順同有愛心係基本，最好係同我一樣鍾意研究飲食，我好鍾意研究食物，有共同興趣多啲話題，對兩個人相處有幫助。」她又稱接受不到對方太「大男人」：「唔想成日都要見面，或者隨便打個電話就一定要見到我嗰啲，好似奉旨咁，我好反感。」

結婚生仔好圓滿

談到身邊愈來愈多好友已婚，她希望可以在30歲做新娘：「細個希望25歲就結，依家唔得喇！希望快啲搵到另一半，拍到30歲就結婚，結婚一兩年生小朋友，咁就好圓滿喇！」雖然未有拖拍，但她已經對婚後生活充滿憧憬：「婚後每日煮早餐畀老公食，之後就做家務，照顧啲貓，有時間就寫吓書！」自言是宅女的她相當重視家庭：「女人有事業固然重要，要有個『家』先係人生圓滿。」

照亮星途

除李曼筠外，還有不少女星憑動漫節或代言遊戲成功上位，由寂寂無聞的模特兒一躍而成電影明星。

周秀娜

周秀娜在2004年參加動漫節，更在Game Girl大賽選舉中奪得亞軍，被封為「翻版樂基兒」，其後更推出個人寫真及攬枕而引起熱話，近年以2,000萬港元身價轉戰影壇。

郭書瑤

台灣女星郭書瑤早年憑代言網絡遊戲《殺很大》，從寂寂無聞的普通女生一夜間紅遍台灣，自此入行開始演藝事業，去年更勇奪台灣金馬獎最佳新人獎。

何佩瑜

何佩瑜（Jeana）於2007年參加亞洲遊戲展小姐競選取得冠軍而彈起，其後陸續推出寫真集吸引宅男，近年轉戰影壇，人氣有增無減。

後記：「動漫Maggie」烙印

近年事業多方面發展的李曼筠，除了出活動、拍電影及為節目做主持外，更做才女出飲食書，在工作上跟動漫節已無甚關係可言，不過仍被稱作「動漫Maggie」，談到是否想過搣甩「動漫」這兩個字，換上另一個暱稱，她笑說「動漫Maggie」這個名已成為她的一部分：「叫咗咁耐感覺好親切。有時到內地工作，一講『動漫Maggie』啲人已經知我係邊個，我好好奇當日係邊個幫我改呢個名，好想多謝佢幫我改呢個名。」