回復單身一年多的周秀娜，前晚與一眾師弟妹到中環出席經理人Roy的生日派對，雖然娜姐當晚性感欠奉，但仍吸引不少男士上前索合照。席上大隻仔師弟Dominic全晚孖實娜姐咬耳仔，氹得娜姐不時笑咪咪，事後問到是否越級追娜姐，他直認不諱：「了解中！」

娜姐獨個兒離開派對，嘴扁扁的她似乎唔想咁快同Dominic分開噃！

Dominic與娜姐在生日派對上不時咬耳仔，儼如一對情侶。

Dominic

場內不少男士都圍住娜姐（中）轉，似足招親大會！

現年28歲的周秀娜（Chrissie），自前年12月宣布與拍拖多年的陳偉成（Avis）分手後，感情至今未有着落。前晚娜姐出席經理人Roy在中環舉行的生日派對，廣邀猛男出席招親會，同場還有趙勁皓、何浩文（Dominic）、DaDa、CoCo及Hailey C.等一班師弟妹。

席上眾人不時跳舞及暢飲香檳，場面熱鬧，當有人捧出生日蛋糕時，娜姐表現興奮，童心未泯的她隨即又拿着兩個氣球自娛。雖然她當晚性感欠奉，但仍吸引不少男士上前要求合照，同行的師妹為怕場面失控，即時為娜姐築起人牆擋駕，繼而造就了Dominic與她獨處的機會。

只見他倆坐在一旁，Dominic不停與娜姐咬耳仔之餘，又為她斟香檳，大獻殷勤，氹得「女神」不時甜笑，其後二人更愈坐愈埋，當發現場內有記者後，娜姐為免太過張揚，於是先行與助手離開，而Dominic則留低繼續玩，未知是否玩得不夠盡興，沿途見娜姐不時嘴扁扁。

「繼續了解吓！」

25歲的Dominic，入行後曾與不少女星傳緋聞，有指前女友糖妹因他過分「花弗」而飛起他。記者昨日致電Dominic，問到當晚為何與娜姐頻頻咬耳仔，他說：「我知佢前排去咗上海做嘢，冇見一排，都係關心吓近況，我哋咩都傾！」問到是否有意追求娜姐，他沒有否認：「繼續了解吓！一路都有聯絡，同埋大家呢期都有追韓劇，有好多話題。（越級挑戰？）做朋友冇級數之分，Chrissie同我唔係講級數嘅人。（繼續約食飯了解？）有時間就會約。」