雨僑終於搵到好歸宿！她昨日以一身性感新娘裝舉行「婚禮」，宣布正式「嫁」入「星娛樂」。雖然事業泊得好碼頭，但雨僑仍想專心工作，故現實上嫁杏無期，不過她卻踢爆媽媽恨嫁女！

谷行事業線的雨僑簽名，正式「嫁」入新公司。

捧着金鎖匙的雨僑「嫁」得好，蕭定一（左）亦很開心。

雨僑昨日在九龍塘一所婚宴場地舉行記者會，宣布加盟新唱片公司「星娛樂」，以低胸性感新娘裝力谷三吋事業線的她，挽着經理人公司老闆蕭定一進場，其後又宣讀誓詞，宣布「嫁」入新唱片公司，更獲飾演其老公的男Model獻吻。而唱片公司則送上金鎖匙，寓意雨僑有輝煌成就，盡快買到黃金屋。

雨僑受訪時表示滿意加盟新公司的酬勞，問到為何「婚禮」的男主角不是緋聞男友羅力威？她說：「今日個新郎係我揀，因為佢好靚仔！佢（羅力威）啱啱開完演唱會，今日只係簽約形式嚟。」

母親想見張智霖

問到何時出嫁？雨僑說現時事業為重：「簽咗新約，工作擺第一位。」她又指日後若舉行婚禮，不會穿得太性感，一切從簡。

她又透露媽媽亦有到場「觀禮」，更大爆媽媽心急為她設計結婚場地：「阿媽好似睇樓咁，睇呢度可以擺幾多圍，話呢度唔錯。（佢幫你計劃緊？）可能由我出世就已經幫我計劃，阿媽好恨我嫁。」問到媽媽對羅力威意見，她笑說：「唔知呀！要問佢。佢成日跟我做嘢，見過我好多朋友，淨係未見過張智霖，所以好唔開心。」