與男星徐正曦玩姊弟戀的周麗淇，其舊愛兼紗廠太子爺Eric也不愁寂寞，昨日被《好報》爆料指與前中國小姐趙哲妤拍拖！趙哲妤昨日甜絲絲未有否認，還讚對方人品好外，更揚言拖仔去酒店並非唔見得光！

趙哲妤翹實Eric行海旁，邊傾邊甜笑勁Sweet！

海旁依偎完未夠喉，趙哲妤與Eric轉戰車廂繼續溫馨。

與紗廠太子爺Eric拍拖多年、有望入豪門做少奶奶的周麗淇（Niki），無奈三年戀情前年告終。去年，Niki終於打爛Dry缽，拍內地劇時與徐正曦擦出愛火，而舊愛Eric亦有新着落！據《好報》披露，Eric原來與去年剛加入以葉劉淑儀為首的新民黨、前中國小姐趙哲妤（Uny）拍拖，並拍得兩人甜蜜歎雞煲，再到海旁談心。

教做生意擦火花

正在熱戀的Eric與Uny，在浪漫氣氛下又攬又錫，其後轉戰到Eric的座駕繼續談情。Eric主動施以慢攻向Uny調情，輕吻對方額頭後欲再下一城親香澤，但Uny怕醜地推開，改以小鳥依人靠向對方。此時，Uny上半身突然消失，良久才「蒲頭」，並對Eric主動獻吻及擁抱，可謂千依百順，意猶未盡的兩人最後齊到酒店繼續蜜會！

Uny昨日接受本報電話訪問時甜絲絲回應緋聞，未有否認拍拖：「我哋了解中，大家識咗好幾年，佢人品唔錯，對我幾好，我依家做生意，畀唔少意見我。」對於車廂激戰又轉到酒店繼續煙韌，她自言並非唔見得光︰「都係正常朋友做嘅嘢，又唔係唔見得光，酒店都可以有好多嘢做。」問到會否擔心與Niki比較，她信心十足說︰「我唔驚比較！佢入行耐啲，但女人同女人比各有各好，唔覺自己會輸蝕。」