「大隻港男」溫家偉、關宛珊（Kimmy）及林芊妤（Coffee）相約到遊樂場玩耍盡顯童真，自由身的他們希望今年工作長做長有，單身的大隻仔及Coffee表示唔急拍拖，蜜運中的Kimmy則事業行先，未有嫁期。

關宛珊（右）與林芊妤齊聲表示要在事業上衝刺。

鬼仔性格的溫家偉（中）口花花，即被關宛珊（左）及林芊妤「教訓」。

關宛珊（左起）、溫家偉及林芊妤三個大細路，走在一起玩唔停。

溫家偉（Alan）、關宛珊及林芊妤都是活潑之人，難怪非常投緣老友鬼鬼，三人相約到兒童遊樂場玩到癲，Alan盪鞦韆及搖搖公仔時，兩女搞笑地用力狂Fing他，結果Alan被推跌碌地沙，現場充滿歡樂笑聲！三人現時與無綫沒有經理人合約，希望以自由身多接工作，並笑言想有贊助商安排他們主持旅遊節目，Kimmy說：「最想去北歐旅行，因為快樂指數好高。」

感情方面，Alan去年與岑麗香傳緋聞，但他表示來港多年一直沒有拍拖，因個性太直而經常被誤會到處撩女仔：「我鍾意外國人性格多啲，香港女仔諗嘢好深奧，我好簡單o架！（想拍拖？）唔會刻意。」

遭舊愛嫌性感

Coffee與Kimmy齊撐Alan口花但心不花，單身的Coffee說：「佢只係對熟朋友口花花。」又表示唔急拍拖，Alan即搞笑地自我推銷，無奈慘食檸檬！形象性感的Coffee慨嘆被前男友嫌暴露：「其實唔係好性感啫！可能我冇咩所謂，監製會搵我做呢類角色。（之後會為拍拖而收起性感？）係自己想嘗試多方面嘅嘢。」Kimmy大方承認有拍拖兩年的男友，但暫時專注工作，未有結婚打算：「近幾個月好多工作機會，想繼續拍劇、做主持同返內地登台，搵多啲人仔先。」