久未露面的陳慧珊（Flora）早前被拍得面部有傷痕，她昨日接受訪問時澄清只是意外，對於傳遭受家暴，她即怒斥過分：「我冇嘢需要遮掩！」

Flora（左）和Ada一對好姊妹悉心打扮，齊齊接受節目訪問。

眉頭帶傷的Flora澄清受傷只屬意外，並非家暴所致。

陳慧珊昨日偕好友蔡少芬（Ada）接受無綫節目《燭光晚餐》訪問，Flora日前被拍得滿面傷痕，隨即傳出疑似遭受家暴。昨日她的眉頭仍黐住膠布，當記者要求影單人照時，她抗拒地稱「唔使」，與Ada合照後即獨自行開。事後Flora解釋傷痕是帶囡囡去踩單車時弄傷：「護膝、頭盔放咗上車準備同佢戴，開咗少少車門點知唔記得，一烏低就撞落車角位，撞爆咗個T位，當時我揞住好痛，突然手指罅滲晒血！」丈夫見狀即着她去醫院，後來找來熟悉的美容醫生縫針，問到怕不怕留疤痕？Flora說：「唔會，因為傷口位好多血管，都預咗有少少，冇所謂。」問到被指遭受家暴會否不高興？她激動地指過分：「我諗冇人會信！大家知我同老公嘅關係，唔需要講畀大家聽，我冇嘢需要遮掩，最緊要影迷知我冇事，做呢個節目係想大家知我OK！」她又稱有意報讀博士學位課程，若時間許可會拍劇。

蔡少芬冇能力添B

而Ada自爆十多年前眼部曾撞傷，當時懶理未有縫針，後來問醫生是否需要去疤，對方竟答：「老咗都會有條痕，由得佢！」結果傷口慢慢愈合。Ada又指大腿有兩撻疤：「有次我畀細女聞蒸氣，佢扯滾水倒落我大髀，即刻起水泡！我立即搽燙火膏，老公幫我拮爆佢！」她又自認樣靚身材好，不介意追多個仔，但老公張晉呻湊小朋友攰，更笑指生多個是禍，Ada笑說：「媽咪想我生，老公話10年後，我叫佢搵第二個生啦！（你肯？）我唔肯！我都冇能力！」