「細細粒」陳嘉佳被勒令減磅，不過她接令多時仍當耳邊風，結果迫在眉睫才「的起心肝」，揚言會拿出「20磅誠意」入劇組，又指自己會戒澱粉質，可惜仍被踢爆食3包薯片當早餐！

細細粒揚言有信心減20磅，大家拭目以待！

王祖藍自爆拍攝《食為奴》時曾燒傷面部要入急症室。

沈卓盈以「爆牙造型」嘟嘴Chok甫，搞到講對白時要不停吞口水，十分搞笑！

王菀之與鄭中基到旺角謝票，相當Happy！

昨晨 「細細粒」陳嘉佳偕沈卓盈（Jess）及泰臣等參與無綫節目錄影，期間她自爆4月3日將要參加《老表2》開鏡，又透露監製安排了她與林盛斌（Bob）配成一對，為免「逼爆鏡頭」，故月前已出聲叫她減肥40磅，難怪她苦着臉說：「之前去咗幾次旅行，返嚟仲肥咗少少，係自己冇下決心，今日開始戒澱粉質，點都要減20磅，攞啲誠意出嚟，我有信心可以做到！過幾日再去上海，返嚟一定要認真減喇！」可惜此話一出，即被Jess踢爆她早上食3包薯片充飢，認真為食！

祖藍燒傷面入院

Jess以王菀之的「金雞齙牙造型」亮相，不過假齙牙只貼在牙齒上，搞到靚女說對白時不停吞口水，樣子惹笑！她透露早前完成《區區有運行》主持工作後，愛上了這方面工作：「跟9位風水師學到好多嘢。（真係變咗沈大師？）都係！信多咗風水擺設，麥玲玲話我旺夫益子相。」

王菀之認間中同居

同樣有份演出《老表2》的王祖藍，昨日在電台訪問中自爆拍《食為奴》一個火燄雪山的菜式，因工作人員加火水時發生搶火意外，他面部被燒傷要入急症室，要停工兩日，他承認刻意隱瞞事件：「燒到冇晒眼睫毛、冇晒眉毛、面都燒傷，但係似嚴重曬傷嗰種，大家又可以捉穿崩喇！睇吓邊個鏡頭條眉係畫嘅！」當時母親及女友李亞男十分擔心，他即拍照傳相安慰。

另外，王菀之前晚偕鄭中基現身旺角謝票，她大方承認與男友Eric So已發展到「間中同居」階段，但直言未有談婚論嫁。對於《金雞sss》票房近4千萬，她指吳君如承諾帶台前幕後往日本旅行：「佢話帶我哋去搵真嘅拓也哥呀！」