陳奕迅昨日罕有地偕老婆徐濠縈出席好友新店開幕活動，以粉紅色情侶裝示人，他笑言似卡通人物Little Twin Stars，對於老婆揚言「生十個都得」，他卻直言唔識驚！

戴上黑超的Eason無懼阿徐「生十個都得」，準備接招！

風騷的千嬅大晒收身成果。

人緣不俗的設計師何志恩，成功邀得Eason與阿徐穿情侶裝亮相。

陳奕迅（Eason）與老婆徐濠縈昨日以情侶裝現身時裝設計師好友何志恩（Johanna）新店開幕，問到是否收友情價？他說：「吓！要收錢o架咩？咁Friend唔使啦！有靚衫送畀我得啦！」

「興奮」生十個

Eason繼而自爆去年諸事不順唔開心：「諗番係唔順！（條氣唔順定工作？）兩樣，今年順番喇！社會反應變咗，但我冇變，我成日神經質。」他又重提新年落機黑面一事，解釋並非故意發脾氣：「晏晝點幾兩點閃（影相）個女唔好！」對於老婆阿徐早前聲言「生十個都得」，他說：「佢興奮得滯啫，諗嘢唔清楚。做藝術嘅人有時唔理智，唔會思前想後。（嚇親？）我好多嘢都唔識驚。」但其後指有兄弟姊妹照應是好事：「慢慢嚟，我哋好Sweet，着到孖公仔咁出嚟，好似Little Twin Stars，我就嚟染埋粉藍色頭！」

同場嘉賓還有楊千嬅、鄭希怡、琦琦及馬詩慧等，千嬅透露將為電影宣傳，又受老公影響做運動：「佢去跑山我跟唔到，會同佢做Gym，已經減咗5磅，目標係15磅。」至於邀請不少圈中好友出席的Johanna，提到Eason唔收酬勞時說：「真係碌盡人情卡！」提到Eason兩公婆着情侶裝，她笑說：「係我安排，難得夫妻檔梗係要啦！（佢哋罕有一齊出活動！）係！大小品牌都請唔到。」