張敬軒前晚擔任徐小鳳紅館演唱會嘉賓，落足嘴頭和心思氹前輩開心的他，除自嘲不及小鳳姐「大波」外，又突然化身露體狂露「底」，嚇得小鳳姐大叫「唔好嚇我」。

小鳳姐笑言當年因工作而報大了10歲。

與小鳳姐抱抱的軒仔不停賣口乖讚她又香又索。

軒仔大讚穿粉紅色裙的小鳳姐似苗條紅衫魚，認真搞笑。

張敬軒、盧冠廷及盧海鵬前晚擔任《小鳳姐走過順逆流，依然金光燦爛徐小鳳2014演唱會》第三場紅館演唱會嘉賓，軒仔跟小鳳姐合唱《舊夢不須記》後，攬住前輩大讚「好香、好靚、夠潮」，又讚她的粉紅色束腰裙凸顯了其經典黃蜂腰，似足一條紅衫魚，令小鳳姐哭笑不得。

軒仔向小鳳姐甜言蜜語一輪後，突然化身露體狂，慢慢拉開外套「嘩」一聲向她露「底」，不過他所露的是穿在內裏的波點毛衣，得知被整蠱的小鳳姐笑言：「你唔好嚇我，仲以為你裏面冇着衫，你個姿勢好似雨中怪客。」軒仔表示波點毛衣是為襯她而着，自感波點造型跟小鳳姐遜色得多：「波波衫代表你，不過我嘅波唔及你嘅波大，我身上嘅波同身上嘅波點都唔及你身段勁﹗」小鳳姐也笑說軒仔着波點衫似貼了藥膏。

報大10歲

而另一嘉賓盧冠廷上台時，竟斗膽以女人最忌的年齡作話題，他表示在網上得知小鳳姐的歲數，未被嚇窒的她反擊說：「假嘅，當年我出嚟搵嘢做時怕唔夠年齡，報大咗10年！」盧冠廷甘拜下風大讚小鳳姐「好嘢」。