無綫小花馬賽早前出國旅行再惹緋聞，她昨日與劇集《守業者》演員馬浚偉等到長洲出席活動時回應被指與空中少爺過從甚密，急急劃清界線指兩人並不認識，只是「Fans合照」。

馬賽落力追波，無奈追到跪地兼仆倒，陰功豬囉！

蔡思貝腳面一彈破網，巾幗不讓鬚眉！

楊明「細佬」慘食波餅，搞到幾咁尷尬。

楊怡（右）及樂瞳返中環碼頭派平安包，力谷收視。

馬浚偉到訪長洲，不少街坊爭相拍照。

邵美琪與楊明切蛋糕，楊明更大方送吻，卻嚇親對方。

劇集《守業者》演員馬浚偉、楊明、邵美琪與世界盃大使馬賽、陳凱琳、蔡思貝及許亦妮等昨日到長洲宣傳，先與行政主席梁乃鵬吃鮑魚午宴，女主角楊怡及樂瞳因工作率先乘船返中環，但不忘帶平安包在碼頭派街坊。剛下船的楊怡表示食得太飽暈船浪，問到會否到長洲及離島拍拖？她說：「都係開工多，因為怕暈浪勁嘔，我一搭船就會啪定藥。」談到《守》劇開播收視僅26點，她依然信心十足，並力撐民初劇含查案元素相當吸引。

其他藝員留守長洲，馬浚偉、麥長青、楊明與黃長興玩舞獅，又組成TVB隊與長洲小型足球總會比試足球，最終2：2平手。TVB由助理總經理區偉林守龍門，每救險球都獲全場拍手，而楊明「細佬」慘食波餅，馬賽則太落力仆倒，追波追到跪地。

提到早前到斯里蘭卡旅行傳緋聞，馬賽否認與空中少爺同遊：「唔識個男士！只係Fans合照，當地網絡又差，換酒店先知報道寫成咁。（有好多張合照流出喎！）機組人員入住嗰間酒店同我哋同一間，有Fans要求合照，我覺得開心！（個男仔有冇你電話？）冇！唔識o架！佢只係普通影迷。我好內疚，不停收到長輩電話問呢件事。（搵個真命天子？）想以工作行先，我男友就係我工作。」

馬浚偉開心多人Like

而負責打氣的馬浚偉自爆最近狂食增磅，但未Ready騷肌，並透露因血糖低不可戒油戒糖，提到收視則說：「唔可以話滿意，係慢慢升緊，希望結局有30點，最開心主題曲多人鍾意，年底唔知有冇獎呢？（想拎亞太區最受歡迎男歌手？）旺角區OK喇！」另外，本月27日生日的邵美琪及楊明於晚宴時喜獲蛋糕慶祝，邵美琪透露未知會否跟男友施祖男慶祝，問到是否想收戒指？她說：「我唔鍾意，不如食啦！朋友會整朱古力。」