鍾嘉欣日前拍劇從櫃員機提錢出來「萬歲」，後來卻發現餘款不翼而飛，面懵心精的她笑言當買個教訓，亦沒有懷疑公司同事的操守。拍檔敖嘉年笑指嘉欣「大頭蝦」，並繼續在其傷口上灑鹽：「早知係咁，叫佢繼續請食嘢啦！」

「略開中門」的嘉欣自爆「離奇失竊事件」，卻處之泰然！

高海寧自稱會Set好隨身篋密碼以防失竊。（資料圖片）

「落井下石」的嘉年笑言嘉欣應繼續萬歲。（資料圖片）

嘉欣最近夥拍敖嘉年等忙為無綫新劇《大藥坊》開工，她前晚打扮性感出席《加昇駿馬迎新歲新春晚會》時，自爆遇上「離奇失竊事件」：「有日喺提款機提咗6千蚊出嚟，叫Pizza請大家食，埋單約2千幾蚊，跟住嗰幾日都冇乜點用過錢，銀包約有3,500蚊左右啦，點知有日走去超級市場買生果，畀錢時打開銀包先發現得番150蚊！」

對於「失竊」，嘉欣思前想後都百思不得其解：「有懷疑過畀人偷咗，亦唔知係咪大意跌咗，總之個銀包只係放喺自己個隨身篋度。（唔報警？）當時拍緊外景，所以冇搞，咪當破財擋災囉！（有冇擔心過同事手腳唔乾淨？）我冇，亦都冇唔開心，以後叫自己小心啲好過啦，自己嘅嘢梗係要自己負責，唔會懷疑人哋，咪當買咗個教訓囉！」

高海寧戥肉赤

對於嘉欣「唔見錢」，敖嘉年接受電話訪問時竟笑說：「佢有時懵吓懵吓啫，可能放咗喺第二度唔知，我都試過類似情形，一個月後喺牛仔褲袋搵番。早知係咁叫佢繼續請食嘢啦，哈哈！」

同劇的高海寧亦戥嘉欣感到非常肉赤，她說：「三千幾蚊好多喇，真係可憐！我都有拖篋做嘢，但每次都會Set好密碼，或者交畀場務代為保管，未試過唔見嘢。」