森美捱到病拍拍吓辭演
忙於拍無綫新劇《使徒行者》的森美，已完成部分戲份，不過，昨日爆出他以身體健康為由辭演，其角色更臨急臨忙改由馬德鐘補上。自言是始作俑者的森美，接受電話訪問時不停為辭演深感歉疚：「對唔住TVB！」
陳敏之（右起）與阿佘及森美合作拍劇，已知道森美辭演的決定。
森美又要拍劇又要忙於錄影《我要做老闆》，確係分身不暇！
森美身兼多職，搞到健康出問題，無奈辭演拍攝中的《使徒行者》，並由馬德鐘頂替。（設計對白）
近年密密撈過界的森美，除擔任電台DJ外，身兼多職的他又要拍劇、擔任司儀及主持真人騷節目等。近日他與舊柏檔陳敏之、許紹雄及佘詩曼等人合作無綫新劇《使徒行者》，正當拍得如火如荼之際，他日前卻捱到病發高燒，為免拖累拍攝進度，以健康為由無奈辭演。無綫得悉後，已連忙力邀馬德鐘頂替其角色，身為義氣仔女的馬德鐘雖然身在外地，但已拍心口答應演出，並將於數日後開工。原本森美的角色將不會改變，馬德鐘繼續與陳敏之飾演情侶，但礙於早前森美已完成一部分戲份，馬德鐘需多花一個多星期重拍森美已完成的戲份。
向無綫道歉
森美昨日接受電話訪問時，坦承因身體健康而退出，並自言是始作俑者，與人無尤：「呢排好忙，又要電台又要錄影無綫節目《我要做老闆》，加上新年高峰期接咗好多司儀Job，最後捱病咗發高燒。我都有衡量過身體係咪捱唔到，以前就算病，我都頂住返電台，今次以為自己捱到，但當日真係『冧廠』拍唔到，我好少病到咁！」
已拍攝約10組戲的森美，雖然戲份不多，但仍擔心會拖延拍攝進度，故忍痛決定退出，他說：「初頭有諗住減戲份算，但都擔心減咗，身體都捱唔到。」對於開拍後才辭演，他不停表示「好唔好意思」，並說：「對唔住TVB，知佢哋好辛苦，的確係我時間上有缺失，監製已經好好，唔阻礙我電台工作，又好遷就我時間，我都知我個期一直搞到佢哋好頭痛，我已經係例外，如果平時其他小生要接出面嘅Job一定冇咁易。」他又澄清非電台不允許拍劇：「電台唔會干涉我DJ以外嘅工作，上次拍劇都有身兼多職，但今次真係始料不及。」
願承擔損失
對於劇組已找馬德鐘頂上，森美坦言未收到通知及一切留待無綫決定，目前只知道會暫停拍攝有關他的戲份。問到可會擔心辭演後負面新聞接踵而來？他說：「如果有，都願意接受，因為真係自己問題！之前同敏之同Benz雄合作多，我諗佢哋會體諒。（怕無綫追討損失？）樂意承擔，我真係影響到拍攝！」
