陳慧琳為拍攝電影而遠赴布拉格多日，與兩個愛兒分開的她心掛掛，得知囝囝因掛念她而爆喊，搞到她非常心痛，拍攝時又險傷及頭部！　

Kelly、家輝（右）和伊健在記者會上大擺甫士，非常有默契！

Kelly指着家輝的「玉腿」大讚幼細。

電影《盜馬記》在北京舉行記者會，主演的梁家輝、陳慧琳（Kelly）和鄭伊健均有出席。

《盜》片在布拉格以實景拍攝，育有兩子的Kelly需要遠赴當地多日，她表示拍攝初期每日都心掛掛，得知囝囝因掛念媽咪而爆喊後，令她更心痛：「當時非常慘，掛得好緊要！不過之後都適應咗，因為我日日都要開工，日子好快過。（返到香港，囝囝有冇唔認得你？）我去咗布拉格一個禮拜，阿仔喺屋企聽到門鐘，就以為係我返嚟，點知一開門見到唔係我，就即刻喊晒！我老公拍咗呢段片畀我睇，我見到非常心痛，自己都喊埋一份！」

Kelly還透露拍攝攀石場面時差點出意外，她從足足有一個身位高之處摔下，更險傷及頭部！

攀石跌親老公懶理

雖然Kelly險受傷，但她表示老公依然放心讓她拍戲：「現場有拍低過程，我都有Send條片畀老公睇！（老公有冇呵番，叫你唔好再拍危險戲？）佢又冇喎！佢覺得冇嘢，唔覺得危險，因為我仲行得走得！」

至於同台的家輝拍攝《盜》片時亦曾傷及肋骨，因而推掉回巢TVB拍劇的計劃，而他相隔廿年再次與伊健合作，大讚對方成熟有韻味。而伊健就老婆蒙嘉慧日前滑雪受傷一事作出回應，表示她將在下月開工拍劇，目前正在休息。